Mitingog na si Mayor Michael Rama nga adto gayud ipahigayon ang Sinulog 2024 sa South Road Properties (SRP).
Kahinumduman nga niadtong Sinulog 2023 wala mosalmot ang kalungsuran sa Sugbo tungod kay mipaluyo sila sa hukom ni Gobernador Gwendolyn Garcia nga maglain sila sa pagsaulog sa ilang Sinulog nga didto gihimo sa lungsod sa Carmen.
Nagtuo ang mga Sugbuanon nga nasulbad na ang panagbangi nila ni Cebu City Mayor Michael Rama ug Gob. Garcia kay usa na man ka tuig human nahitabo kining wa nila pagkasinabot sa pagbalhin sa Sinulog ngadto sa South Road Properties (SRP).
Dugay na usab nga gasigi og pahibawo ang Siyudad sa Sugbo sa ilang tinguha nga didto sa SRP ipahigayon ang mga kalihukan sa Sinulog 2024. Walay nagpaabot nga motumaw ang sususamang panagbangi sa duha ka mga lider sa Sugbo sa mao gihapong isyo.
Buot sa gobernador nga ibalik sa Cebu City Sports Center (CCSC) ang maong kasaulugan.
Gipaluyuhan siya sa mga mayor sa Metro Cebu ug kalungsuran samtang wa pa kita makadungog og dagkong politiko nga mipaluyo kang Mayor Rama.
Nganong karon pa man maglantugi ang atong mga political leader kon asa ipahimutang ang selebrasyon nga kapin na lang sa buwan himuon na ang Sinulog?
Kining Sinulog garbo sa mga Sugbuanon apan karon murag gihimo kita’ng sumsuman sa ubang mga lalawigan kay sa simpleng mga desisyon lalisan man nato sud sa taas nga panahon.
* * *
Dili na komedya kining pagpanaway ni Bise Presidente Sara Duterte Carpio sa bag-ong palisiya ni Presidente Marcos nga paghatag og amnestiya sa mga kaniadto ug karon mga rebeldeng grupo sama sa Moro Islamic Liberation Front (MILF), Moro National Liberation Front (MNLF), Communist Party of the Philippines –New People’s Army National Democratic Front (CPP-NPA-NDF) ug uban pa.
Samtang uyon ang Bise Presidente nga mangita og paagi alang sa kalinaw ang atong gobiyerno, apan supak siya nga hatagan sila og amnestiya. Iyang gitawag kining joint communique tali sa Marcos administration ug sa NDF-Philippines didto sa Oslo, Norway nga “agreement with the devil.”
Kahinumduman nga gisaway usab ni VP Duterte ang pamahayag ni Marcos nga pag-estudyo sa posibleng pagbalik sa Pilipinas isip sakop sa International Criminal Court (ICC).
Mao ba kini nagpamatuod nga aduna nay problema sa Marcos – Duterte Uniteam?
(mannyrabacal1144@gmail.com)