Rabacal
Rabacal

Rabacal: Joint venture or misadventure?

Adunay mga gisudlan nga joint venture agreements (JVAs) o kasabutan ang iyudad sa Sugbo nga hangtod karon wala makapadayon sigun sa nasabutan. Ang Joint Venture Agreement for Carbon Market Redevelopment Project nga paghimo’ng moderno sa labing dako nga “farmer’s market” sa siyudad ngadto sa usa ka commercial, heritage ug cultural district apan nahunong ang trabaho hangtod karon. Ang problema kay naapil sa maong agreement ang propriyidad sa Compania Maritima nga giangkon sa Cebu Port Authority (CPA) nga ubos sa Department of Transportation (DOTr) ug anaa pay kaso sa korte.

Ang project developer nga mao ang Megawide Construction Corporation (MCC) miangkon nga tungod niining maong kalangay dako na kaayo sila og nagasto unya wala pay misulod sa ilang panudlanan. Si Cebu City Mayor Mike Rama igo na lang mitul-id sa ubang probisyon sa maong joint venture agreement nga gipirmahan sa milabay nga administrasyon. Ang maong proyekto naggahin og P8 bilyunes.

○ ○ ○

Lain usab nga joint venture agreement mao ang development plan sa Inayawan Landfill ug ang 60-ektarya nga Pond A sa Cebu City South Road Properties (SRP). Ang maong kasabutan gipirmahan niadtong Enero 2022 tali sa Expedition Construction Corporation (ECC) ug ni Mayor Mike Rama nga nirepresentar sa Siyudad sa Sugbo. Sumala sa akong tinubdan nga nag hatag og problema sab kuno ang mga nagpailang tag-iya sa mga yuta sa sanitary landfill.

Sa usa ka privilege speech, si Cebu City Council Minority Floor Leader Konsehal Nestor Archival mikwestion sa maong agreement tungod kay maalkanse kuno ang Siyudad sa maong proyekto. Sa pagtambong ni Rama sa usa ka sesyon sa Konseho, iyang giawhag ang mga konsehal nga tul-iron ang maong kasabutan inay nga kanselahon.

Nganong karon pa man nangguwa kining maong mga isyo? Wala ba diay basaha sa mga konsehal ang maong kasabutan sa wala pa nila giaprubahan? Gikahadlukan nga kon ugaling dili mahinayon kining maong mga joint venture agreement o kasabutan, makabayad og dakong danyos and Siyudad sa Sugbo ngadto sa mga proponent niini. Husto ba nga adunay pipi­la ka mga tawo nga motawag niini nga “misadventure” inay nga mapahimuslan unta kini sa Siyudad sa Sugbo? (mannyrabacal1144@gmail.com)

Related Stories

No stories found.
SunStar Publishing Inc.
www.sunstar.com.ph