Daghang nagduda nga kining gihimo ni Speaker Martin Romualdez gitumong aron mominus ang popularidad ni Bise Presidente Sara Duterte Carpio nga gituhoang maoy lig-ong mokandidato pagka-presidente sa tuig 2028. Gani tungod niining mga isyo batok sa Bise Presidente, ang iyang amahan, si kanhi presidente Rodrigo Duterte namahayag nga dili siya gusto’ng modagan sa pagka-presidente ang iyang anak. Gidasunan usab kini ni VP Duterte nga dili siya interesado nga mag-presidente.
Gituhoan gilayon sa katawhan nga si Senador Imee Marcos maoy mopuli sa iyang igsuon kay si Presidente Bongbong Marcos dili naman makadagan sigun sa atong Batakang Balaod.
Samtang daghan na kita’ng makita ug mabati nga mga commercial advertisement ni Sen. Imee, nitumaw usab dayon kining isyo kalabut sa pagbuhi sa charter change (Chacha). Buot sa Ubos Balay-Balauranan nga usbon ang economic provisions sa batakang balaud aron makadani kuno ang Pilipinas og daghang mga foreign direct investors (FDI). Apan si Senador Robin Padilla nisugyot nga usbon ang term limits sa mga piniling opisyal.
Apan ang dugay nang gidebatihan sa mga kongresista ug mga senador kon si kinsa ang mo-amendar sa Batakang Balaod. Anaay Constitutional Convention (CONCON), Constitutional Assembly (CON ASS) ug People’s Intiative (PI).
Sa Concon kinahanglang mag-eleksiyon aron pagpili og mga delegado. Gastuso kini kay gawas sa dako’ng salapi nga igahin alang sa maong eleksiyon, kinahanglan pa gayud nga gahinan sila og laing pundo alang sa ilang mga opisina ug mga trabahante. Sa Con Ass nga pagasakpan sa mga piniling kongresista ug mga senador gilalisan kon unsaon ang pagbotar. Maghiusa ba ang Kongreso ug Senado o mag-iya-iya ba sila pagbotar? Ang PI ambot og kompleto na ba ang implementing rules niini?
Daghang nagduda nga ang tinuod nga katarungan niining CHACHA mao ang paglugway sa termino sa anaa karon sa pwesto apil na sa presidente. Mao man gani tingali nga napikal si Sen. Marcos niining maong kaugmaran. Ambot og aduna pa bay igong panahon sa paghisgut niini? Angay nga hinumdumon nga ang tanang mga kongresista ug pipila ka senador magpapili pag-usab sa 2025 elections.
* * *
Wala malipay si Mayor Mike Rama niining pagminus sa mga konsehal sa bonus nga iyang gisaad alang sa mga trabahante sa City Hall. Buot sa mayor nga ihatag gayud ang kinatibuk-ang P35,000 alang sa mga regular ug casual employees ug P10,000 alang sa mga job order (JO) workers inay sa gi-aprobahan sa Konseho nga P20,000 alang sa mga regular ug casual samtang P5,000 alang sa mga JO.
Gihangyo sa mayor nga magpatawag og special session aron maaprobahan gayud ang iyang gustong kantidad.
Ambot og mausab pa ba ang baruganan sa hapit tanang mga konsehal? Dinhi unya nato makita kon si kinsang konsehal ang paling-paling og desisyon. Ato usab nga masaksihan kon asa kutob ang impluwensiya ni Mayor Rama sa iyang mga kapartidong konsehal. (mannyrabacal1144@gmail.com)