Rabacal: Mayor Rama ug ang Konseho

Rabacal
Rabacal

Kumusta man ang relasyon nila ni Mayor Mike Rama ug sa iyang mga konsehal? Daghang nakapangutana niini tungod sa mga panghitabo samtang nagbakasyon ang mayor og kapin sa usa ka buwan sa Australia.

Ang una niini mao ang pagminus sa P35,000 nga bonus nga gisaad sa mayor ngadto sa mga empleyado sa Cebu City hall nga gihimo nalang P20,000 alang sa mga regular ug casual samtang gikan sa P10,000 gihimo na lang P5,000 alang sa job order workers.

Ang labing grabe mao ang mahitungod sa budget sa 2024 diin nangayo ang buhatan ni Mayor Rama og P100 bilyunes apan P22 bilyones lamang ang giaprobahan sa Konseho. Wala gani kini katunga sa 2023 budget nga P50 bilyunes.

Ambot og unsay gibati sa mayor niining maong kaugmaran apan iyang gipangayo ang transcript sa budget hearing kay buot niyang masayran kon giunsa pagdebati sa mga konsehal sa pagkab-ut sa P22 bilyunes nga budget sa 2024. Unsa man ang gipasabot niini?

Wala pa usab maaprobahi sa mga konsehal ang adjustment sa fair market value or ang real property tax (RPT) sa Cebu City.

Kompiyansa tingali ang mayor nga aprobahan sa mga kaabin niyang konsehal ang gipangayo niyang bonus ug ang budget bisan kon wala siya dinhi sa Sugbo kay sa wala pa siya mobiya sa siyudad natuman man ang hapit tanan niyang gipangayo.

Unsa man gayud ang tinuod nga katarungan sa mga konsehal nga wala na man sila maminaw sa mayor? Mausab pa kaha ang ilang baruganan mahitungod sa maong mga mahinungdanong isyo?

Kita sayod nga nagsingabot na ang local elections sa 2025 diin managan na sila pag-usab. Nagpasabot ba kini nga mabungkag na ang Partido Barug ni Mayor Rama o nahadlok ba lang ang mga konsehal nga dili na sila botohan pagbalik kon ipadayon nila kining dako kaayong buluhisan ug ang pagahin sa budget nga dili makobra ang dako kaayong kantidad?

Kining mosunod nga mga adlaw padung sa local elections atong makita kon unsa ang impluwensiya ni Mayor Rama sa iyang mga kaalyado. Ang mga konsehal karon mao sila si: Pastor Alcover, Nestor Archival, Joel Garganera, Jerry Guardo, Edgardo Labella II, Mary Ann de los Santos, Joy Augustus Young, ug Noel Wenceslao sa North District. Jose Lorenzo Abellanosa, James Anthony Cuenco, Francis Esparis, Rey Gealon, Donaldo Hontiveros, Jocelyn Pesquera, Renato Osmena, Jr., ug Philip Zafra sa South District. Franklyn Ong, presidente sa Association of Barangay Councils (ABC) ug Rhea Mae Jakosalem, SK Federation President. Kinsa kaha kanila ang mosuporta sa Barug?

Unsa na man unya kadtong hugonhugon nga si Goberandor Gwen Garcia moapil na sa politika sa Cebu City? Modagan ba siya sa pagka-mayor o si Bise Mayor Raymond Alvin Garcia ba maoy iyang paluyohan batok kang Rama? (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph