Nasiak na ba ang Uniteam nila ni Presidente Bongbong Marcos (PBBM) ug Bise Presidente Sara Duterte? Gipanghimakak kini ni PBBM kay suma pa niya maayo kaayo ang ilang relasyon.
Nagsugod kini’ng pagduda sa katawhan sa dihang gitangtang ni House Speaker Martin Romualdez si kanhi Presidente Gloria Macapagal Arroyo (PGMA) sa pagka-Senior Deputy Speaker tungod sa hugonhugon nga interesado kini mag-speaker. Tungod niini, ni-resign si VP Duterte sa partido Lakas nga gipangulohan ni Speaker Romualdez isip presidente sa patido ug si PGMA maoy President Emeritus. Gisundan kini sa pagsaway ni Duterte kang Romualdez nga iyang gitawag og “tambaloslos.” Murag mibalik ang kasaysayan kay si Duterte man suma pa, ang nangampanya aron matangtang si kanhi speaker Bebot Alvarez ug gipuilihan ni PGMA.
Kini si PGMA kanunay mokuyog kang PBBM sa tanang mga biyahe sa Presidente sa nagkalainlaing nasod. Apan human siya gitangtang pagka-senior deputy speaker, wala na nato siya makita sa kiliran ni Marcos.
Tingali’g nagduda usab si PGMA nga adunay pagtugot ni PBBM ang pagtangtang kaniya. Dili man ko motuo nga ingon niana kaisog si Romualdez nga magbuot-buot lang og papahawa sa suod sa Presidente. Gisundan dayon kini sa pag-utingkay sa mga kongresista sa confidential and intelligence fund (CIF) sa Bise Presidente hangtud nga gikiha gyud siya sa pipila ka concerned citizens.
Misamut og kagubot sa dihang morag naghuramentado si kanhi Presidente Rodrigo Duterte (FPRRD) sa iyang paglaban kang Inday Sara. Tungod niini, namahawa ang daghang mga sakop sa PDP-Laban Party. Tungod usab niini mipahibawo siya nga dili siya gusto na modagan si VP Sara pagka-presidente. Mao usab kini ang gipahibawo sa Bise Presidente.
Ang labing maayo modala sa iyang pamolitika mao si Senador Imee Marcos nga gituohan sa kadaghanan nga maoy makaatbang ni VP Sara sa sunod presidential election. Iya gayong gipatuo ang katawhan nga nagpaluyo siya sa mga Duterte.
Karon nga maingon nato milampus na ang pagguba nila kang Inday Sara, mapaabut ba nato ang Imee Marcos-Sara Duterte tandem?
○ ○ ○
Kaniadto ang tabi-tabi mao nga adunay mga sakop sa Armed Forces of the Philippines (AFP) nga naghulga nga maghimo og kudeta batok sa administrasyon ni Presidente Marcos. Ang tumong ug tuyo kuno niadto mao ang pagtangtang kang Marcos aron mapulihan siya ni VP Sara. Nahunong man ang maong hulga. (mannyrabacal1144@gmail.com)