Sumala sa katigulangan, “Mibukal nang kaldero sa politika” sa Sugbo. Daghan na kitag madunggan nga diskusyon sa mga kapihan sa nagkalainlaing kamada sa mga kandidato sa umaabot nga piniliay sa 2025.
Nag-una kanunay ang ngalan ni Bise Mayor Raymond Alvin Garcia nga ilang gituhoan nga modagan sa pagka-mayor batok kang incumbent Mayor Mike Rama. Ang ngalan nila ni Konsehal Dondon Hontiveros, Metro Cebu Water District (MCWD) Chairman Joey Daluz ug kanhi konsehal Dave Tumulak maoy kanunay hisgutan nga ipares kang Garcia. Mahimo kuno silang suportahan ni Cebu Governor Gwendolyn Garcia.
Lain usab nga gihugonhugon mao ang panag-uban nila ni Konsehal Mary Ann de los Santos pagka-mayor uban kang Konsehal Joy Pesquera pagka-bise. Gituhuoan nga kon modagan si Mayor Mike Rama sa pagka-senador, si Kongresista Edu Rama maoy modagan puli kaniya nga maoy modala sa Partido Barug.
Sa laing bahin, anaay ngalan nga kanunay hisgutan sa mga supporter sa Bando Osmena-Pundok Kauswagan (BOPK) nga si kanhi Bureau of Customs Commissioner Filemon Yogi Ruiz. Siya kunoy paluyohang kandidato ni kanhi mayor Tomas Osmeña. Gitudlo si Ruiz ni Presidente Ferdinand Marcos Jr. sa maong posisyon niadtong Hulyo 25, 2022. Gihulipan hinuon siya human sa usa ka tuig sa pangatungdanan. Nahimo usab siyang regional director sa Philippine Drug Enforcement Agency sa Central Visayas ( PDEA 7) sud sa pito ka tuig. Apan ang mga tigpaniid sa politika nagduda nga mapugos gayud si Osmena paglansar kon magkalandrakas ang politika sa siyudad.
○ ○ ○
Sa Cebu province, wala pay kandidato nga sarang makapildi kang Governor Gwen Garcia. Anaa hinuoy mga hulga sa uban niyang mga dumadapig sa lalawigan. Sama pananglit sa Consolacion diin dunay hugon-hugon nga modagan ang anak ni Kongresista Sonny Lagon batok kang Mayor Teresa Alegado. Si Mayor Ahong Chan atbangan kuno pagbalik ni kanhi mayor Paz Radaza. Sa Mandaue City, murag milurang man ang balita sa kandidatura ni Kongresista Emmarie Ouano “Lollipop” Dizon kay mas daghan man ang mga barangay kapitan nga nagpaluyo kang Mayor Jonas Cortes nga ningdaug sa miaging barangay electiona atong Oktubre 2023 ikomparar sa gamay ra kang Dizon. Kon kini maoy basehan sa umaabot nga eleksyong lokal, murag tungason alang kang Dizon ang pagdaog pagka-mayor sa Mandaue City.
Sa Talisay City, adunay nilutaw nga ngalan sa usa ka Gullas nga maoy modagan puli kang Mayor Samsam Gullas. Ang mga naandang kaatbang sa mga Gullas nanikaysikay na usab karon.
Sa lalawigan gibalita nga si Bise Gobernador Junjun Davide modagan pagka-kongresista sa 2nd District batok kang incumbent Congressman Edsel Galeos. Dako kining maong distrito diin anaa ang balwarte sa mga Davide nga mao ang Argao. Apil usab dinhi ang Alcoy, Boljoon, Dalaguete, Oslob, Samboan ug Santander. Ang modagan sa pagka-bise gobernador uban kang Garcia mao si Daanbantayan Mayor Sun Shimura. (mannyrabacal1144@gmail.com)