Nagpasalamat ako nga nagkasinabot ra gayud sila si Cebu City Mayor Mike Rama ug Gobernador Gwen Garcia kalabot sa pagsaulog sa Sinulog 2024. Kahinumduman nga sa miaging tuig wala moapil ang Lalawigan sa Sinulog 2023 ug didto kini nagpasundayag sa Carmen, Cebu tungod kay wala si Garcia nakauyon nga himuon ang Sinulog sa South Road Properties (SRP).
Dili pa lang dugay nasayran na lang sa mga Sugbuanon nga dili diay gihapon gusto ang gobernador nga adto sa SRP himuon ang kalingawan sa Sinulog. Maayo na lang kay napangitaan og win-win solution nga mao ang pagpasundayag sa Sinulog sa Kabataan sa Lalawigan sa Cebu City Sports Center (CCSC).
Hinaut pang mao na kini sinugdanan sa pagsinabtanay sa atong mga líder sa politika dinhi sa Sugbo bisan kon magkalainlain silag partido politikal. Tungod niining wala pagsinabtanay sa atong mga poltiical leaders kaniadto, hapit wala gayuy dakong proyekto nga nahimo dinhi sa Cebu City. Ang katapusan mao ra gayud ang Cebu Bus Rapid Transit nga naaprubahan sa panahon pa ni anhing Presidente Benigno Aquino III sa tuig 2014. Dugay hinuon kining nasugdan ug gani nagsige pa ang pagtrabaho niini hangtod karon. Ang dakong proyekto sa lalawigan mao ang Marcelo Fernan bridge nga naaprubahan sa panahon ni Presidente Fidel Ramos ug natapus sa administrasyon ni Presidente Joseph Estrada.
Diha unta kadtoy tulo ka mga flyover nga tukuron sa Cebu City diin na-award na ang bids niini apan gipugngan nila ni Mayor Rama ug concerned citizens. Gani, gisayangan si anhing gobernador Lito Osmeña sa maong mga proyekto nga wala mahinayon.
Maayo hinuon nga panig-ingnan ang Mandaue City ug Lapu-Lapu City kay tungod sa pagkasinabut nila ni Mayor Jonas Cortes ug Mayor Ahong Chan, adunay daghang naaprubahan nga mga proyekto alang sa ilang tagsa-tagsa ka mga dapit.
Anaay tukuron nga ika-upat nga taytayan nga magsumpay sa Mandaue City ug Mactan nga mobalor og mga P10 bilyunes. Anaa usay skyway nga tukuron gikan sa North Reclamation area sa Mandaue City side sumpay sa tukurong taytayan nga mobalor og kapin sa P50 bilyones. Samtang ang Lapu-Lapu magtukod og 3-km. Coastal highway nga mobalor og mga P6 bilyones. Anaa usab kini skyway nga magsumpay sa CCLEX padung ngadto sa Mactan Cebu International Airport (MCIA). Wa pa kini labot sa ugmaron unya nga reclamation area sa Mactan. Sa Consolacion-Liloan sugdan na usab ang pagtukod sa Cebu International Port (CIP). Unsa may nahatag ni Presidente Bongbong Marcos nga proyekto sa Sugbo nga unta dako man siya og botos nga nakuha dinhi? Nangayo ba usab og infrastructure projects ang atong mga lider? (mannyrabacal1144@gmail.com)