Rafter: Polis duna nay hulagway sa tulisan nga mipusil sa tutor nga iya untang biktimahon

MAY HULAGWAY: Gibutyag ni Police Lieutenant Colonel Janette Rafter nga duna na silay hulagway sa tulisan nga nipusil kang Jemelita Balaba Salvador apan wa pa lang silay ngalan. /
MAY HULAGWAY: Gibutyag ni Police Lieutenant Colonel Janette Rafter nga duna na silay hulagway sa tulisan nga nipusil kang Jemelita Balaba Salvador apan wa pa lang silay ngalan. / CCPO FB page

Nagpadayon ang kapulisan sa dakbayan sa Sugbo pag-ila sa nagbinugtong nga tulisan nga nitulis sa usa ka 26 anyos nga tutor niadtong Miyerkules Santo sa gabii, Marso 27, 2024, sa New Imus Road, eskina General Maxilom Avenue, Barangay Lorega San Miguel, dakbayan sa Sugbo.

Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga wala mohunong ang ilang mga imbestigador pagpangita sa maong tulisan nga naratol ug nakablitan ang gatilyo sa armas sa dihang nisukol ang biktima nga si Jemelita Balaba Salvador, taga Nasipit, Talamban, dakbayan sa Sugbo apan lumad nga taga Maasin, Southern Leyte.

Naigo ang biktima sa liog, nga daling gidala sa publikong tambalanan samtang dali nga nakasibat ang tulisan sakay sa laing PUJ nga paingon sa downtown area.

Duna nay hulagway ang kapulisan sa tulisan apan wala pa nila kini mailhi.

Gitug-an ni Rafter nga naa sa stable ang kahimtang sa biktima bisan kon dili pa kini makatingog sanglit ipaubos pa kini sa minor surgery sa liog.

Gihangyo nila ang publiko nga dunay impormasyon sa hulagway sa suspek nga i-report dayon sa labing duol nga police station sa dakbayan sa Sugbo aron ilang madakpan sa labing dali nga panahon.

Si Police Colonel Ireneo Dalogdog, hepe sa CCPO, nimando sa iyang mga imbestigador nga sulbaron ang maong kaso aron mahatagan og hustisya ang nahitabo sa biktima.

Gipasalig sa kapulisan nga ilang sulbaron ang maong krimen ug mapanubag sa balaod ang nagbinugtong nga tulisan. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph