Gihipos sa mga sakop sa Road Management Authority kun RMA sa Cebu City ang duha ka puthaw nga railings nga maoy nakadat-og patay sa 4 anyos nga batang lalaki sa dihang natumba niadtong Lunes sa hapon, Oktubre 14, 2024.
Gipahibawo sa apuhan sa bata nga si Juanito Sandoval atol sa exclusive interview sa DYHP RMN CEBU sa programa ni Atty. Ruphil F. Bañoc - Straight to the Point nga gitakdang ilubong nila si Crismark sa Oktubre 23.
Na-emosyonal ang mga iyaan sa bata lakip na ang apuhan (habig sa amahan niini) nga mag-birthday unta karong Nobiyembre 7.
Usa sa mga iyaan sa bata nga si ‘Erika’ nibutyag nga katapusan nilang estorya sa iyang pag-umangkon mao ang wish unta niini nga mosuroy atol sa iyang birthday ug magpapalit og sapatos.
Nasayran nga wala na mag-ipon ang ginikanan sa 4 anyos sanglit ang amahan niini nabilanggo sa Minglanilla Police Station samtang ang inahan nagpabuwan sa mao gihapon nga lungsod ug ang apuhan na lang ang nagbuhi niini.
Gibutyag ni Erika nga matag hapon daghang mga bata nga magduwa sa dapit diin nahitabo ang disgrasya.
Gibadlong na nila si Macoy nga dili magsige og duwa apan mibalik gyud kini tungod kay nalingaw nga daghan sa iyang mga kaila nga bata nga nagduwa usab.
Human sa insidente dali nila nga gidala sa Cebu City Medical Center apan tungod sa kadako sa kadaut sa ulo sa biktima, gibalhin kini sa Vicente Sotto Memorial Medical Center diin didto na nabugtoan sa kinabuhi alas 4 sa kaadlawon sa Martes, Oktubre 15, 2024. / AYB, Hulagway hinatag sa DYHP RMN CEBU