Padayon ang kainit sa Rain or Shine Elasto Painters ug ilang gipayukbo ang Blackwater Bossing, 110-103, sa main game niadtong Sabado sa gabii, Abril 6, 2024 aron inaton ang ilang sunodsunod nga kadaugan ngadto sa tulo sa Philippine Basketball Association (PBA) Season 48 Philippine Cup sa Ninoy Aquino Stadium.
Human sila nasugamak sa kapildihan sa nag-una nilang upat ka mga duwa, nga nagpahiluna kanila sa labing ubos nga puwesto, ang Elasto Painters ningsaka na karon sa ikawalong dapit dala ang 3-4 nga rekord.
Gipangulohan ni Santi Santillan ang Elasto Painters pinaagi sa iyang 28 puntos, nidugang og 21 puntos si Beau Belga samtang niamot og 16 puntos si Jhonard Clarito. Ang Bossing, nga nahagbong sa 3-3 nga rekord, gipangulohan ni Rey Suerte pinaagi sa iyang 20 puntos.
Sa premirong duwa, gipanglampornas sa NLEX Road Warriors ang Magnolia Chicken Timplados Hotshots, 87-74.
Ang Road Warriors ningpahugot sa ilang paggunit sa ikaduhang luna bitbit ang 5-1 nga rekord samtang ang Hotshots ningkanaug sa ika-10 nga puwesto dala ang 1-2 nga baraha. / ESL