Nanawagan si kanhi Mayor Michael Rama ug electoral reform human sa resulta sa 2025 midterm election ug nagtinguha sa usa ka hybrid election system nga hiusahon ang automated ug manual vote counting.
Malauom si Rama nga tagdon sa Commission on Elections (Comelec) ang iyang election protest nga gisang-at niadtong Huwebes, Mayo 22, 2025.
Gusto ni Rama nga himuon ang manual recount sa botos sa tanang mga presinto sa Cebu City. Matod niya nga kahiwian'g technical sa Automated Counting Machines (ACM) ang nakabiktima niya.
Iyang giprotestahan sila si Mayor-elect Nestor Archival ug outgoing Mayor Raymond Alvin Garcia.
Nag-una sila ni Rama nga nahimutang sa ikatulong dapit.
Hybrid Election
Sa usa ka press conference sa Lunes, Mayo 26, 2025, si Rama nanawagan og hybrid election system alang sa pagboto, pag-ihap, ug paghiusa sa botos.
Iyang gipasabot nga ang pag-usa sa automated ug manual counting maoy moseguro sa kaligdong sa electoral process.
Matod niya nga ang resulta sa Mayo 12 nga eleksyon wala motakdo sa tinuoray nga panghitabo.
Nahinumdoman ni Rama nga ang iyang kapildihan sab sa pagka mayor sa 2016, resulta sa problema sa automated vote-counting machines ug mga kakuliang technical.
Pulong niya nga sa kontrobersiya sa “Hello Garci” daw susama kini sa nahitabo sa pag-ohay lang natapos nga eleksyon.
Sa karong tuiga, nakaapektar sa iyang kandidatura ang kakuliang technical.
Nakasugat siya og technical issues atol sa iyang pagbutar sa iyahang presinto sa Guadalupe Elementary School nga nilanat og usa ka oras una gidawat sa ACM ang iyang balota.
Ang iyang Partido Barug Team Rama nidaog lang og upat ka barangay sa South district nga gikonsiderar nilang balwarte ug usa lang sa North district, sa kinatibuk-ang 80 ka barangay sa Cebu City.
Sa nangagi'ng eleksyon, dili moubos sa 200,000 ang botos nga iyang makuha apan karong bag-o nakakuha lang siya og 120,000 votes nga gihulagway niya'ng timailhan nga gikalimtan na siya sa mga Sugbuanon.
“The 120,124 votes so far, is the lowest number of votes which is said that I have garnered in all political exercises since 2021, where I ran for Mayor and Vice Mayor in the City of Cebu,” matod ni Rama ug nidugang nga , “statistically impossible.” / EHP