Gitugyan ni kanhi Cebu City Mayor Michael Rama ang iyang nepotism ug grave misconduct case sa Supreme Court (SC) human gibasura sa Ombudsman ang iyang motion for reconsideration.
Matod ni Rama niadtong Miyerkules, Pebrero 19, ang petisyon nga iyang gisang-at sa SC niadtong Pebrero 10, nga naghangyo nga iinbalido ang tibuok proceedings sa Ombudsman tungod sa kakuwang sa hurisdiksyon ug paglapas sa iyang konstitusyonal nga katungod sa paspas nga disposisyon sa mga kaso nga anaa na sa kinatas-ang hukmanan.
Iyang gihulagway nga ang timing sa desisyon sa Ombudsman nga bag-uhay lang nigawas usa ka pagsulay sa pagduso sa petisyon nga iyang gisang-at sa SC.
Sa desisyon sa Ombudsman, pinetsahan og Enero 15, 2025, ang anti-graft court mipatigbabaw sa silot niini nga dismissal sa katungdanan ug perpetual disqualification sa paghupot og public office batok sa gitaktak nga opisyal.
Gisubli ni Rama niadtong Martes, Pebrero 18, nga gisuportahan sa Ombudsman ang ilang desisyon apan wala kini gipatuman dayon.
“Ang tanan naa karon sa Korte Suprema. Nganong karon ra man ta nakadungog ani,” matod ni Rama.
Dugang pa niya nga ang desisyon sa Ombudsman dili usab makaapekto sa iyang kandidatura sa pagpapili pag-usab isip mayor sa Dakbayan sa Sugbo sa umaabot nga eleksyon sa Mayo 2025.
Gitataw ni Rama nga dili siya sad-an sa nepotismo, sukwahi sa ruling sa Ombudsman nga sad-an siya sa pagkuha og duha ka bayaw isip empleyado sa city hall, sanglit mas grabe pa ang mga kaso sa nepotismo sa ubang mga departamento sa city hall diin ang mga empleyado paryente ug silingan.
“Kining akong mga bayaw naa na sa city hall isip mga empleyado bisan pa sa nangaging mga administrasyon,” matod ni Rama.
Sa laing bahin, si Commission on Election (Comelec) 7 Director Franciso Pobe niingon nga ang desisyon labot sa estado sa kandidatura ni Rama magagikan sa Comelec Central Office. / EHP