Nilarga na usab si Cebu City Mayor Michael Rama sa Singapore human ni-file sa iyang unang pagbakasyon ning tuig 2024.
Kini human sa lima ka semana sukad siya niuli sa Sugbo gikan sa iyang kapin sa usa ka buwan nga bakasyon sa Australia niadtong 2023.
Bisan sa kasamtangang nagbakasyon sa Singapore, si Rama niingon nga siya magtrabaho gihapon.
Sa interbyo sa online program sa Cebu City Hall sa Huwebes, Enero 25, 2024, si Rama nagkanayon nga kauban niya sa bakasyon ang iyang asawa ug anak.
Kauban niya sila si Melquiades Feliciano, chairman sa iyang gitudlo nga Metropolitan Cebu Water District (MCWD) board; Budget Officer Jerone Castillo; ug hepe sa Planning and Development Office nga si Joseph Michael Espina.
Ang leave sa chief executive nagsugod niadtong Martes, Enero 23. Gipaabot nga mobalik siya karong adlawa, Enero 27, 2024.
Sa samang pakighinabi, si Rama niingon nga nakadawat siya og imbitasyon nga mahimo’ng mamumulong sa 2024 Smart City Summit sa Taiwan karong Marso.