Giandam na sa kapulisan sa dakbayan sa Sugbo ang kasong frustrated murder batok kang Andrew Salera nga naila sa ngan nga Range 999, lumad nga taga lungsod sa Boljoon, apan kasamtangan nga nagpuyo sa Barangay Bacayan, dakbayan sa Sugbo.
Siya ang gitumbok nga nipusil kang Michael George Richey, 37, American national, kinsa naa pa sa tambalanan nagpaalim sa samad pinusilan sa abaga ug paa.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga naa na sa luwas nga kahimtang ang biktima.
Gipaabot nila nga makagawas ang biktima sa tambalanan sa dili pa mapupos ang reglementary period sa pagpasaka og kaso.
Kon dili kini makahimo nunot sa pagpabilin pa niini sa tambalanan, mamahimo nga ang CCPO lang una ang mopasaka sa kaso ngadto sa Cebu City Prosecutor’s Office.
Una na nga nipasabot si Salera kon nganong iyang gipusil ang langyaw.
Matod niya nga kini tungod sa giingong pagbinastos sa iyang mga higala nga babaye sa sulod sa usa ka bar.
Giingong nagkagubot sa sulod sa imnanan apan gipagawas sa management ug didto sa gawas nahitabo na hinuon ang laing kagubot nga niresulta sa pagpamusil.
Nipasabot si Rafter nga dili lang kini ang unang higayon nga dunay insidente sa kagubot sa sulod sa imnanan ug gipa gawas sa mga security personnel ug didto na hinuon nahitabo ang pagpamusil.
“Dapat dili nila pagawason kon naay mag-away sa sulod sa ilang imnanan, Ilang buhaton ilang i-pacify nya manawag silag police. Dili kay ilang abugon sa gawas nya didto na hinuon mag patay,” matod ni Rafter. / AYB