Laing petisyon ang gisang-at batok ni Cebu City Mayor Raymond Alvin Garcia sa tinguha nga ma-disqualify sa iyang pagpapili pag-usab isip mayor tungod sa giingong pagpanagtag og bugas sa panahon sa eleksyon.
Ang petisyoner, si Analiza Pilunes Maglasang, usa ka rehistradong botante ug residente sa Barangay Talamban, Cebu City, maoy nisang-at sa maong disqualification petition batok ni Garcia sa atubangan sa Commission on Elections (Comelec) niadtong Abril 23, 2025, nga nipasangil nga ang mayor nakalapas sa Section 261(v)(2) sa Omnibus Election Code.
Ang petisyon nanawagan sa Comelec sa pag-disqualify ni Mayor Garcia sa pagdagan pagka-mayor apan kon siya modaog, i-nullify ang iyang kadaugan.
Ubos sa Section 261(v)(2), gidili ang paggasto ug pagpagawas sa pondo sa gobyerno alang sa mga social welfare projects sa panahon sa kampanya.
PAMOLITIKA
Samtang si Garcia nihulagway sa maong disqualification petition nga politically-motivated ug nagtuo nga nabalaka na iyang kaatbang ilabi na nga nag-una siya sa bag-uhay lang nigawas nga survey.
Si Garcia nanguna sa survey nga “Voters’ Preference and Perspectives Survey for Cebu City,” nga gipagula sa Lunes, May 5, 2025, sa Department of Political Science sa University of San Carlos (USC) pinaagi sa Centre for Governance, Leadership and Development, usa ka semana sa wala pa ang midterm elections.
Nanguna sab siya sa Boses ng Bayan survey sa RP-Mission Development Foundation Inc.
“Nganong hatagan man nato ni og dako kaayong importansya ug kahulogan… pero sige nalang, nigawas naman gyud na sa media,” matod pa ni Garcia.
Si Garcia nagpadagan pagka-mayor sa Cebu batok ni kanhi mayor Michael Rama, konsehal sa syudad Nestor Archival, kanhi Custom Commissioner Lorenzo “Yogi” Ruiz, ug independent candidate Juliette Co. / EHP