Karon nga pipila nalang ka adlaw bag-o mopuli ang bag-ong administrasyon sa Cebu City Hall, si outgoing Mayor Raymond Garcia namahayag nga dili mag-apil-apil sa daw panagbangi karon sa partido sa Bando Osmeña Pundok Kauswagan (BOPK).
“That is really a matter between their party, dili gyud ko manghilabot ana,” matod ni Garcia, subay niining wala nagkauyon nga baruganan tali ni Mayor-elect Nestor Archival ug Vice Mayor-elect Tomas Osmeña sa bag-o lang naaprobahan nga revised Comprehensive Zoning Ordinance.
Matod ni Garcia nga ang iyahang pamaagi sa politika lahi sa uban nga dili motuman sa ilang pasalig ngadto sa publiko.
“When I campaign, I campaign sincerely. Meaning, when I gave speeches, it was in accordance with my conscience on what my principles are and what I truly believe in,” matod niini.
Dugang ni Garcia nga dili siya klase nga mosulti ngadto sa publiko kon unsa ang gusto niini mapaminaw aron lamang makuha ang ilahang boto, itandi sa gipasalig sa BOPK ngadto sa Carbon vendors nga dili himuong commercial ang merkado.
“Ila na ng internal problem, dili nako manghilabot ana.”
“Once you overpromise and overpromise and then you cannot deliver, motagam na gyud ang tao nimo ana. Labi na og politika,” dugang niini kinsa misaysay usab sa mga natuman niya nga pasalig susama sa libre nga maintenance nga mga tambal ug ang malampuson nga bidding alang sa Cebu City Medical Center (CCMC) Phase 5.
Hinuon gihulagway niini nga sayo pa kaayo aron mosulti nga dako na kini nga panagbangi sa umaabot nga administrasyon.
“I think it’s too early to say if there is a rift or not. There may be a misunderstanding or miscommunication, but you’ll only know the rift if tinud-anay nagyud, like sa elections magkabuwag na gyud. Karon, it’s very premature.”
Sa usa ka Facebook post sa kaniadto page sa Cebu City Public Information Office nga karon “Cebu Updates,” namatikdan ang wala pagtinagdanay ni Archival ug Osmeña atol sa oath-taking ceremony sa BOPK niadtong Huwebes, Hunyo 26.
Dihang gipangutana kabahin niini gibutyag ni Archival nga wala pa sila nagkaestorya ni Osmeña kabahin sa maong isyu. / JPS