Gipanghimakak ni kanhi Mayor Raymond Alvin Garcia ang pasangil ni Bise Mayor Tomas Osmeña bahin sa mahal nga pagpalit og sakyanan.
Matod ni Garcia ang pasangil pagpalit og BYD Tang electric SUV nga nagkantidad og P4.4 milyunes nakanselar ug wala gyud bayari sa Cebu City Government.
“Na-cancel na man to nga transaction. In fact, the City Government has not paid a single centavo on it,” pahayag niya.
Giklaro ni Garcia nga human niya giendorso ang pagpalit, nangayo siya og legal opinyon gikan sa City Legal Office.
Dihang dili paborable ang opinyon, gipakanselar dayon niya ang transaksyon ug gibalik ang sakyanan sa dealer sa wala pa siya mobiya sa katungdanan niadtong Hunyo 2025.
Gikumpirmar sab ni Architect Florante Catalan sa Office of the Building Official (OBO) nga gibalik ang BYD Tang unit sa dealer.
Matod niya, anaa ra ang sakyanan sa ilang kustodiya sulod sa usa ka semana para sa testing apan wala gyud nadayon ang pagpalit. / EHP