Nanawagan si Mayor Raymond Alvin Garcia sa mga pribadong individual ug mga kompaniya nga ni-withdrew sa ilang P200 million nga donasyon alang sa Cebu City Medical Center (CCMC) nga idirekta na lang kini og hatag sa kagamhanan sa Dakbayan sa Sugbo o motabang sa pagpamalit og mga medical equipment.
“If they withdrew, then I hope they will donate it now to the City Government para magamit namo ang kuwarta sa pagpahuman sa CCMC,” matod ni Garcia atol sa media forum sa Miyerkules, Mayo 7, 2025.
“If they do not want to donate directly to the City, I am hoping that they will just buy equipment for the CCMC,” iyang gidugang.
Gipasalig ni Garcia nga ang pag-withdraw sa mga donasyon dili makalangay sa paghuman sa ospital.
Ang mayor gitakda nga mopirma og kontrata alang sa pagtapos sa fourth, fifth ug sixth floors sa CCMC kansang orihinal nga building nadaot sa linog niadtong 2013.
Ang bag-ong CCMC, anaa gihapon mahimutang sa N. Bacalso Ave., ug mahimo na unyang napulo ka andana.
Gustong susihon ni Garcia kon nganong ang mga donor nakahukom sa pagduso sa ilang donasyon sa Cebu Medical Society (CMS) nga dili usa ka government entity.
Sayo niini, si Garcia niawhag sa mga donor nga iderekta ang ilang donasyon sa City Treasurer’s Office pagseguro nga duna kini “clear accountability of funds” imbes mogamit og third party.
Ang SunStar Cebu nitaho niadtong Nobiyembre 2024 nga ang CMS nakadawat og P205 milyunes aron gastuhon pagtukod sa structural framework alang sa ika- eighth ngadto sa tenth floors sa CCMC.
Niadtong Disyembre 2023, si kanhi mayor Michael Rama nipahibalo nga ang paghuman sa eighth, ninth ug tenth floors sa CCMC mahitabo pinaagi sa mga donor ug dili mogasto ang siyudad.
Matod ni Rama nga nakatigom siya og P1 billion gikan sa pribadong donors.
Nidugang si Rama nga pulitika ang hinungdan sa pagsibog sa mga donor sa ilang saad.
Sa May 1, 2025 report kini naglatid nga dunay higala si Rama nga wa modayon sa iyang P100 million donation, P100 million gi-withdraw sab sa usa ka foundation ug pribadong entity nikansilar sa ilang P20 million nga saad.
Si Garcia nagplano sa pagpangayo ni Rama sa ngalan sa mga donor aron personal niya kining hangyuon.
“If they have the pure intention to help the City of Cebu, especially the CCMC, show me the names so that I can talk to them and I can help them where they can help,” matod ni Garcia. / JPS