GIHIMAKAK ni kanhi Mayor Raymond Alvin Garcia niadtong Huwebes, Hulyo 3, 2025, ang pasangil ni Mayor Nestor Archival nga adunay P2 ngadto sa P3 bilyunes nga budget deficit ang Dakbayan sa Sugbo.
Giinsister niya nga iyang gibinlan og maayong kahimtang sa pinansyal ang siyudad nga P12 bilyunes nga bank deposits.
Sa usa ka phone interview, gikuwestiyon ni Garcia ang basehan sa pahayag ni Archival nga ang kasamtangang administrasyon wala pa makapakita og konkretong numero aron suportahan ang giingong fiscal shortfall.
“Double-digit ang atong cash deposit, unya it’s on record. Moingon siya nga dili ta ka-afford og bayad sa atong Job Order workers—I think it is an inaccurate statement,” matod ni Garcia.
Sayo niini, si Archival nitug-an sa mga tigbalita niadtong Martes, Hulyo 1, nga nakadiskobre ang iyang grupo nga deficit nga P2 ngadto sa P3 bilyunes human sa pag-review sa pinansyal nga kahimtang sa City Hall atol sa Hunyo 30 nga transisyon.
Matod niya nga ang mga numero gikan sa City Treasurer’s Office ug namatikdan nga ang pagpadayon sa operasyon sa miaging administrasyon hangtod sa katapusan sa tuig dako og epekto sa budget sa siyudad.
Kini ilabi na sa pagburot sa gasto sa sweldo tungod sa iyang gihulagway nga sobra kadaghan nga trabahante.
Agi og tubag, giinsister ni Garcia nga dili makatarunganon nga dili ma-renew ang kontrata sa mga Job Order (JO) tungod kay duna may ikasweldo ang siyudad.
“Ang JO dili man gani kaabot og P100 million ang expenses, unya moingon dayon nga deficit ang rason nga dili ma-renew,” matod ni Garcia.
Samtang gipanghimakak niya nga dunay deficit ubos sa iyang termino, gipasabot ni Garcia nga ang mga utang sa siyudad gikan sa miaging mga tuig—ang uban nagsugod pa sa 2008—nagpabilin nga wala mabayri ug mahimong rason sa kasamtangang hulagway sa panalapi.
“Even during my term, naa pay gipabayran nga 2020-2021 payables. If you pay all those tingali, modako gyud ang kulang,” matod niya.
Iyang gidugang nga ang sitwasyon mahimong nakagamot sa wala pa masulbad nga mga utang nga gibilin sa nangaging mga administrasyon.
Gitumbok ni Garcia ang termino ni kanhi Mayor Tomas Osmeña nga dunay wala mabayri nga mga utang gikan sa 2008 hangtod 2009 nagpadayon nga nakapabug-at sa panalapi sa siyudad.
“I am certain that under my watch in 2024 to 2025, there is no budget deficit,” dugang niya. / EHP