Nagtinguha ang kagamhanan sa Dakbayan sa Sugbo nga masugdan na ang operasyon sa package 1 sa Cebu Bus Rapid Transit (CBRT) project sa 2026, ubos sa pakig-alayon sa usa ka pribadong kompanya nga maoy mo-provide sa mga bus.
Kini ang gipahibawo ni Mayor Raymond Alvin Garcia atol sa interbyu sa radyo dyHP niadtong Miyerkules, Mayo 7, 2025.
“Hopefully, by next year, we can begin operating Package 1,” matod sa mayor sa pinulongan’g Cebuano.
Ang package 1 adunay gitas-on nga 2.38 kilometros gikan sa Cebu South Bus Terminal (CSBT) sa N. Bacalso Ave. paingon sa Cebu Provincial Capitol sa Osmeña Blvd. Ang mga bus mahimong pagadumalaon tali sa siyudad ug usa ka pribadong kompanya, sumala ni Garcia.
Sa pakighinabi sa telepono sa SunStar Cebu niadtong Huwebes, Mayo 8, si Garcia niingon nga ang Department of Transportation (DOTr) wala pa makahukom kon kinsa ang mag-operate sa CBRT buses.
Ang DOTr maoy nag-una nga ahensiya sa proyekto.
Gikumpirmar ni Garcia nga lisod alang sa siyudad ang pagpadayon sa operasyon nga mag-inusara, hinungdan nga gikinahanglan ang pag-apil sa usa ka pribadong kompanya.
“It is a very big task for us as a government to run a mass transport system. What we will do, most probably, is partner with an expert in mass transportation,” matod niya.
Niadtong bulan sa Pebrero karon’g tuiga, si Garcia nisugyot mahitungod sa iyang tinguha nga isagol ang mga electric bus sa CBRT system nga iyang gibase sa public transportation system sa Sweden.
Napukaw ang interes ni Garcia human sa courtesy visit sa bag-ong gitudlo nga Swedish Ambassador to the Philippines Anna Pernilla Ferry.
Ang Sweden nag-operate ug BRT system sa Gothenburg pinaagi sa ElectriCity project, usa ka public-private initiative.
Atol sa pagbisita sa ambassador, gipakita sa mga eksperto sa Sweden ang daghang mga inobasyon, lakip ang mga electric bus unit, mga sistema sa pagdumala ug safety features.
Si Garcia niingon nga ganahan siyang mosagop sa susamang mga teknolohiya alang sa transit system sa Dakbayan sa Sugbo.
Ang pakigpulong sa mga opisyal sa Sweden kabahin sa clean energy nagsugod kaniadtong tuig 2022, sa dihang bise mayor pa si Garcia.
Ang plano sa CBRT project gisugdan niadtong 2010, samtang ang mismong proyekto nagsugod niadtong Pebrero 2023.
Ang orihinal nga plano niini nga ang partial operation masugdan na sa ikaduhang quarter sa 2024, samtang ang full operation sa ikaduhang quarter karon'g tuiga, apan ang maong proyekto nakasugat og kalangay hinungdan nga ang full operational status niini gisibog sa 2027.
Ang inisyal nga budget sa maong proyekto nga P16.3 bilyunes nisaka sab ngadto sa P28.78 bilyunes.
Ang Package 1 naglakip sa 13.18 kilometros nga main line nga adunay gipahinungod nga bus lanes, 17 ka estasyon, usa ka depot ug usa ka terminal.
Samtang nagpadayon pa ang mga inprastraktura alang sa Package 2, ang tibuok proyekto gilauman nga 70 ngadto sa 80 porsiyento nga kompleto sulod sa mosunod nga tulo ka tuig, sumala ni Garcia.
Isip kabahin sa iyang plano nga maseguro nga magpadayon ang operasyon sa CBRT station, si Garcia niingon nga iyang gikonsiderar ang usa ka potensyal nga lugar alang sa usa ka estasyon sa may dalan Escario.
Ang SunStar Cebu nitaho niadtong Marso 10 nga ang CBRT project magpadayon nga walay mga estasyon sa dalan Osmeña Blvd., atubangan sa Provincial Capitol.
Sa sayo pa, si Cebu Gov. Gwendolyn Garcia niluwat og cease-and-desist order batok sa katukoran sa bus station sa may Osmeña Blvd. kay makababag kini sa facade sa building sa Kapitolyo nga gitudlo niadtong 2008 nga usa ka National Historical Landmark ug niadtong 2020 nga Important Cultural Property. / DPC