Mahimo na nga matagamtaman ang delicacies sa tersero distrito karon nga mobukas pag-usab ang R’Cebu Expo sa Marso 15, 2024.
Gipahibawo sa Kagamhanan sa Probinsya sa Sugbo nga ang expo ipahimutang sa Robinsons Galleria Cebu Atrium diin makita ang exhibits sa lungsod sa Aloguinsan, Asturias, Balamban, Barili, Pinamungajan, Toledo City, ug Tuburan.
Sa maong exhibits mapalit ang nagkadaiyang delicacies, handicrafts, organic produce, ug impormasyon alang sa tourist sites nga dalit sa matag lokalidad.
Ang maong expo bukas gikan sa alas 10:00 sa buntag hangtod sa alas 9:00 sa gabii, hangtod sa Marso 17.
Unang gilusad sa Kapitolyo ang R’Cebu niadtong Enero 2021 isip ‘revitalization strategy’ pag tabang sa mga micro, small and medium-sized enterprises (MSMEs) aron makabangon human sa pandemya.
Sa tinuig nga expo gipasundayag niini ang local products ug tourist destinations sa matag distrito sa lalawigan sa Sugbo, dili lang sa mga lokal lakip na sa mga turista nga mosuroy sa mall. / ANV