Ang Regional Crop Protection Center (RCPC-7) uban sa taga Municipal Agriculture Office sa lungsod sa Sibonga, Sugbo nisusi sa pananom sa maong lungsod nga gikataho’ng giatake og peste.
Ang mag-uuma nga si Pino Oyangoren Caminade mapasalamaton sa Superbalita Cebu gumikan kay nahatagan og pagtagad ang iyang problema sa pag-ataki sa ulod sa iyang pananom.
Matod pa ni Caminade nga miduaw ang RCPC 7 sa iyang umahan ug nihimo og inspection sa gikataho’ng nagpasad nga ulod hinungdan nga nangadaut ang iyang tanom sa sili nga espada ug paliya.
Usa ka matang sa worm ang mikutkot sa mga pananom ni Caminade. Tungod niini gihatagan siya og insecticide aron sa pagpatay sa maong mga peste.
Una nang nireklamo si Caminade nga 6,000 ka mga punoan sa iyang sili nga espada ug bunga ang di na mapuslan.
Bisan nga iya na kining gibombahan og insecticide apan wa moepekto. / DVG