Records ni Evan Jose Agbong 'gi-tampered': Cesafi

Taym pa
Taym paJun Migallen

Opps.. Gisugat og ma­naglahing mga reaksiyon ang pagpagawas og decision sa buhatan sa Commissioner sa Cebu Schools Athletic Foundation, Inc. (Cesafi) nga nag-disqualify sa University of San José Recoletos (USJR) Jaguars nga makasulod sa semifinals round sa 2023 Cesafi Season.

Ang Jaguars mao gyud unta ang nakakuha sa katapusan ug ikaupat nga luna sa semis dala ang 7-3 nga baraha.

Apan sa dihang gidesidihan sa Cesafi nga di diay kwalipikado ang usa sa mga player niini nga si Evan Jose Agbong nga makaduwa sa tournament, nausab ang kamada sa rankings nga maoy hinungdan sa pagkataktak sa USJ-R sa Top Four.

Tungod sa maong desisyon, gibali ang tanang resulta sa tulo ka mga duwa nga nidaug ang Jaguars diin nakapakita og aksiyon si Agbong. Kini batok sa University of San Carlos (USC) Warriors, Felipe R. Verallo College Foundation ug Southwestern University Cobras.

Ang Warriors nga unta maoy ikalima, nisaka sa ikaupat (6-4) ug maoy nasulod sa semifinals diin ikasangka niini ang defending champion University of the Visayas (UV) Green Lancers.

Sa imbestigasyon sa Cesafi, nasuta nga si Agbong misumiter sa iyang record sa Jose Rizal University (JRU) ngadto sa Cesafi screening committee nianang Septiyembre 8, 2023 nga maoy deadline sa submission of credentials.

Apan, matod pa, nianang October 14, nahibaw-an sa Cesafi nga sa Liceo de Cagayan University diay siya katapusan nakaeskuwela hinungdan nga gipangayuan siya og record nga gikan sa LCU.

Isip pagsanong sa mando sa Cesafi, nianang Oktubre 17, ang USJ-R misumiter sa record ni Agbong sa LCU ngadto sa screening committee.

Dinhi nabantayan nga ang ma­ong record niadto pa diay’ng Hulyo 3 na release sa LCU.

Kini nakapaduda sa Cesafi kon nganong wa man kini giapil pagsumiter sa deadline of submission sa credentials niadtong Septiyembre 8.

Aron pagtino mipalawom sa ilang imbestigasyon ang Cesafi ug, sa makausa pa, miawhag sa USJ-R sa pagsumiter sa school-to-school nga TOR ni Agbong nga gikan sa LCU. Ug dinhi nasuta nga di diay qualified si Agbong nga moduwa sa tournament.

Nadiskubrehan usab nga adu­nay gi-tampered sa record ni Agbong nga maoy una niyang gisumiter sa screening committee.

Alang nako, kining tampering of records usa ka dakong salaod. Matang kini nga gitumong sa pagpamintaha ug pagpanikas nga makahatag og lama sa institusyon nga iyang giserbisyuhan.

Gawas kang Agbong, posibling duna pay laing mitabang sa pagmaniobra niining suway sa pagpalusot.

Kon si kinsa man gani ang nagpasiugda niini kinahanglan nga mapahamtangan sa tukmang silot.

Kini aron paglimpiyo sa liga ug sa samang higayon dili mahimong sumbanan sa uban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph