Gidakop ang usa ka giingong Regional High Value Individual nga drug personality human nakuhaan og gituohang shabu nga mobalor og P340,000 sa Barangay Mantuyong, dakbayan sa Mandaue niadtong Biyernes, Agusto 8, 2025.
Giila ang suspek nga si alyas Jay-r, 29 anyos nga taga Barangay Busay, dakbayan sa Sugbo.
Nadakpan si Jay-r atol sa buy-bust nga gipahigayon sa alas 9 pasado sa kagabhion sa mga sakop City Intelligence Unit ug City Drug Enforcement Unit sa Mandaue City Police Office (MCPO), inabagan sa Philippine Drug Enforcement Agency (PDEA 7).
Nasakmit sa mga kapulisan ang 50 gramos nga gibug-aton sa gituohang shabu nga nagkantidad og P340,000.
Si Police Colonel Cirilo Acosta Jr., ang director sa MCPO, midayeg sa iyang mga sakop sa malampusong pagdakop sa suspek.
“This arrest is a testament to our relentless operations against illegal drugs. We will continue to pursue individuals who threaten the safety and future of our communities,” asoy ni Acosta. / JDG
