Regular flights sa Bantayan magsugod na sa Agusto 28

Regular flights sa Bantayan magsugod na sa Agusto 28
Bantayan Airport

Momubo na unya ang oras sa biyahe gikan sa Mactan Island paingon sa Bantayan Island sa Sugbo gikan sa upat ka oras ngadto na lang sa 30 minutos.

Kini samtang nangandam ang King Aces Travel and Tours Service Inc. (Kattsi) sa paglusad sa mga regular nga biyahe niini sugod sa Agusto 2024.

Ang Kattsi mo-operate og mga flight tali sa Mactan-Cebu International Airport sa Lapu-Lapu City ug Bantayan Island Airport, nga adunay inaugural flights nga gikatakda karong Agusto 28.

Kini nga kalambuan gipahibawo human sa panagtagbo nila ni Kattsi director Germiniano Yuson Jr. ug Cebu Gobernador Gwendolyn Garcia, taho sa Cebu Provincial Government sa ilang opisyal nga news platform sa Facebook.

Ang gobernador gipahibawo atol sa tigom nga ang inaugural flight tickets mapresyuhan og P888; mga eroplano gikan sa French-Italian nga kompaniya nga ATR nga adunay kapasidad nga 72-ka pasahero ang gamiton; ug ang regular nga mga biyahe mo-operate kaduha kada semana, sa Biyernes ug Dominggo.

Ang Kattsi, usa ka subsidiary sa ACDI Multipurpose Cooperative nga nagserbisyo sa mga miyembro sa Armed Forces of the Philippines, ang nag-una niini nga inisyatiba.

Ang kadagkoan sa kompaniya, lakip sila si Gilbert Llanto, chair sa Prime Aces Holdings Corp. (PAHC), ug Augusto Gaite, director sa PAHC, uban sa mga opisyal sa Mactan-Cebu International Airport Authority, ningtambong sa tigom uban ni Gobernador Garcia.

Kini nga kalambuan nahisubay sa giduso sa gobernador alang sa regular nga mga rota sa flight paingon ug gikan sa Bantayan Island Airport.

Aktibo nga gipauswag sa Gobyerno sa Probinsiya ang imprastraktura sa tugpahanan sa isla, lakip ang 1.2-kilometros nga runway extension nga nahuman sa 2020 ug nagpadayon nga mga plano nga i-extend ang runway ngadto sa tulo ka kilometro.

Ang bag-ong rota sa kahanginan gilauman nga mopahimulos sa nagtubo nga turismo sa Isla sa Bantayan, diin ang destinasyon karon nagdani sa 6,000 ka mga bisita sa katapusan sa semana ug 3,000 sa mga adlaw sa semana. Ang isla nabantog tungod sa puti nga mga baybayon ug tin-aw nga tubig.

Ang Gobyerno sa Probinsiya niingon nga kini nga inisyatiba nagtimaan sa usa ka mahinungdanong lakang sa pagpausbaw sa accessibility sa usa sa mga nag-unang destinasyon sa mga turista sa Sugbo, nga posibleng makapausbaw sa lokal nga turismo ug pagtubo sa ekonomiya sa isla. / EHP

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph