Gilauman nga ang rehabilitasyon sa San Juanico Bridge mahimong hinungdan nga magkuwang ang mga produkto nga gikinahanglan sa matag adlaw ug pagsaka sa presyo niini sa Visayas ug Mindanao, pasidaan sa presidente sa usa ka asosasyon sa mga trucker.
Kini human sa mga restriksyon nga gipahamtang sa dagkong mga sakyanan nga moagi sa mahinungdanong taytayan nga nagsumpay sa Leyte ug Samar.
Si Mr. Israel Alin, Presidente sa Visayas United Truckers Association Incorporated (VUTAI), nipahayag niini atol sa paglusad sa prangkisa sa iyang kompanya, ang ALiN Cargo Express.
Iyang giklaro nga ang nagpadayon nga pagtrabaho sa taytayan nakaapekto sa supply chain sa tibuok Visayas ug Mindanao.
Ang Department of Public Works and Highways (DPWH) nagpahamtang og tulo ka toneladang limitasyon sa gibug-aton sa San Juanico Bridge, nga nagdili nga makaagi ang bug-at nga mga cargo truck ug mga bus.
Gipatuman kining maong mga restriksyon aron makahimo og dinaliang emergency repairs ug pagsaka sa load capacity sa taytayan ngadto sa 33 metric tons sulod sa lima ka mga bulan. / HBL