Dako ang alkanse sa mga mag-uuma nga nananom og repolyo sa bukirang barangay sa lungsod sa Dalaguete tungod sa subra nga produksiyon nga hinungdan sa pagtiurok sa presyo sa merkado sa Mantalungon.
Ang Dalaguete giila nga vegetable basket sa Lalawigan sa Sugbo ug ang mga dagkong komprador gikan sa dakbayan ug ubang bahin sa Kabisay-an adto mamalit sa Mantalongon market.
Si Donald Abraham Lara, pangulo sa Municipal Agriculture and Natural Resources Office (Manro), nikompirmar niini nga sitwasyon dihang nahinabi sa Superbalita Cebu sa Miyerkules, Septiyembre 4, 2024.
Matod ni Lara, ang hinungdan sa pagbarato mao ang nagdungan nga pag-ani sa repolyo ug gitumod sa merkado sa Mantalongon nga nagsubra ang supply.
Dugang ni Lara, ang kilo sa repolyo naa sa tag P10, P9, ug P8 tungod sa kadaghan kon itandi sa standard nga presyo matag kilo nga makaginansya ang mag-uuma naa sa P20, P19 ug P18 ang kilo.
Si Lara nagkanayon nga nitabang na sila og market sa maong mga repolyo sa mga dagkong buyers sa Bohol, Negros ug Leyte alang sa maayong presyo.
Unang hitabo kini ning tuiga busa ang lokal nga kagamhanan sa Dalaguete nihatag og ayuda nga seedlings ug abuno ngadto sa mga apektadong mga mag-uuma sa repolyo.
Ug karon may plano ang lungsod nga mopalit og makina nga dryer aron pagproseso nga ma-repack ug ma-stock ang repolyo kon modaghan ang supply ug ibaligya kini sa ubang dapit sa nasod nga nihit na ang suplay.
Dugang ni Lara, ilang giingnan karon ang mga mag-uuma sa repolyo nga di sila magdungan og pananom aron di magdungan usab og ani.
Ang mga mag-uuma nga apektado gikan sa Barangay Mantalongon, Ablayan, Katulohan, Caleriohan, Caliongan Nalhub, ug Dugyan.
MAG-UUMA
Usa ka ka mag-uuma sa repolyo nga si Meraha Jane Acayen Payusan nga taga Mantalongon sa na-interview sa Superbalita Cebu nagkanayon nga P10,000 kapin ang iyang lugi sa ilaha karon nga harvest nga repolyo kay ang kilo tag P8 ug ang iyang halin sa 200 kilos nga repolyo naa lang sa P1,600.
"Kay na pundo sa tulo ka adlaw, gipakyaw nalang og 400 pesos sa buyer.." asoy ni Payusan, kinsa nidason nga standard nga kilo sa repolyo nga makaginansya naa sa tag P20 ang kilo sa komprador.
Matod ni Payusan nga may nangalata na sa iyang mga repolyo nga naa sa iyang uma sa Dumalan.
Lakip sa ilang gasto mao ang labor, abuno ug pesticide moabot sa P14 mil sa igong gidakon sa umahan ni Payusan.
Moabot sa tulo ka buwan ang pag-atiman sa tanom una kini ma-harvest ug mabaligya.