Gimando ni Presidente Ferdinand Marcos Jr., ang pagreporma sa sistema sa transportasyon sa nasod human sa sunodsunod nga mga trahedya sa kaulohan nga gilangkuban sa mga sakyanan nga niresulta sa pagkamatay sa pipila ka mga indibiduwal.
Sa iyang video message, si Marcos nipadayag og simpatiya sa mga pamilya sa mga nangamatay ug nasamdan sa bag-ohay nga mga trahedya sa Subic-Clark-Tarlac Expressway (SCTEX) toll plaza nga niresulta sa pagkamatay sa 10 ka tawo, ug sa Ninoy Aquino International Airport (NAIA) Terminal 1 nga mikalas og duha ka kinabuhi.
Gimanduan ni Marcos si Transportation Secretary Vince Dizon nga mohimo dayon og aksiyon aron mailhan ug manubag ang mga responsable.
“Ten lives were lost in a devastating collision in Tarlac. Days later, two more – one of them a child – were taken in a tragic accident at the airport. These incidents should never have happened,” matod sa presidente.
“We will make the changes that need to be made. We will demand accountability where it is due. And we will build a transport system that truly protects Filipino people,” dugang niya.
Sa insidente sa SCTEX, gikatahong nakatulog ang drayber sa bus samtang nagdrayb hinungdan nga nidaro kini sa laing upat ka mga sakyanan nga nagpaabot sa linya sa pagbayad sa tollgate.
Duha sa mga sakyanan ang hingpit nga nangaguba.
Upat sa mga namatay mao ang mga bata nga padulong sa usa ka religious youth camp, samtang duha ang magtiayon kansang bugtong anak lalaki nga dos anyos ang naluwas.
Hinuon, ang drayber sa bus negatibo sa paggamit sa ilegal nga druga, alkohol sa dihang gipaubos siya sa drug ug liquor test.
Samtang ang nahitabo sa NAIA Terminal 1 niadtong Dominggo, Mayo 4, 2025, kalit nga nisutoy ang usa ka SUV human ninaog ang usa ka pasahero sa departure area nga nakaigo sa daghang mga tawo, lakip ang usa ka 4 anyos nga batang babaye ug usa ka 28 anyos nga lalaki nga parehong namatay.
Didto sa airport ang bata uban sa iyang inahan aron mopagikan sa iyang amahan nga molarga na unta aron manarbaho sa gawas sa nasod.
Gimanduan na ni Dizon ang Manila International Airport Authority ug ang pribadong consortium San Miguel Corporation nga tan-awon ang protective bollard nga gitaod sa lay-by area sa departure bay nga mao untay makapugong sa sakyanan.
Sa press conference niadtong Martes, Mayo 6, 2025, si Palace Press Officer Undersecretary Atty. Claire Castro niingon nga ang mga bollard na-install niadtong 2019 ubos sa administrasyon ni kanhi Presidente Rodrigo Duterte.
Matod ni Castro nga gimando ni Marcos ang dinaliang pag-ilis sa mga bollard aron malikayan ang susamang insidente.
Lakip sa mga reporma mao ang pag-review sa driver licensing system aron masiguro nga kadto rang takus ug responsable nga mga indibiduwal ang tugotan nga maka-drive, ug usa ka nationwide audit sa mga bus operators aron mahibaw-an kon nisunod ba sila sa safety and maintenance standards. /TPM / SunStar Philippines