Duha ka dagkong bitin ang na-rescue sa Dakbayan sa Lapu-Lapu ug ang usa nakapaak.
Unang na-rescue ang gibanabanang 30-kilos nga sawa nga nakit-an sa kisame sa usa ka balay sa Sitio Masulog, Barangay Basak, Lapu-Lapu City Biyernes, Mayo 9, 2025.
Ang sawa nga dunay gitas-on nga duha ug tunga sa metros naluwas sa mga tanod nga sila si Jerwin Lisondra ug Jorge Pogoy.
Nisuway pa unta sa pag-ikyas gikan sa kisame ang sawa.
Ang sawa ilang gitugyan ngadto sa City Environment and Natural Resources Office sa Miyerkules, Mayo 14.
Sa interview sa SunStar Cebu, si Pogoy nitug-an nga dunay usa ka lalaki nga lumolupyo ang nisuway sa pagdakop sa sawa apan napaakan. Ang napaakan gidala sa Lapu-Lapu City District Hospital.
Matod ni Pogoy nga ang sawa nigawas kay nangita og pagkaon tungod sa kagutom.
Samtang usa ka metro ug tunga nga laing sawa nga otso kilos sa Barangay Gun-ob ang gi-turn over sab sa Community Environment and Natural Resources Office (Cenro) sa Martes, Mayo 13.
Ang duha ka sawa itugyan sa Department of Environment and Natural Resources (DENR) Central Visayas alang sa mas maayong pag-atiman. / DPC