Resolusyon sa libre nga bus ride giuyonan sa Konseho

Cebu City Hall.
Cebu City Hall.File photo

Resolusyon nga ibalik ang libreng sakay sa bus alang sa mga empleyado sa IT-BPO ug sa kinatibuk-ang publiko nga nagtrabaho gikan sa tungang gabii hangtod alas 6 sa buntag sa pipila ka mga dapit sa dakbayan sa Sugbo gisumite ngadto sa Cebu City Council.

Ang resolusyon nga gipangamahanan ni City Councilor Nestor Archival giaprubahan sa Konseho atol sa regular session niini niadtong Hunyo 26, 2024.

Sa iyang resolusyon, si Archival niingon nga ang kasamtangang pampublikong transportasyon dili makasugakod sa daghang mga pasahero ug limitado ang schedule sa biyahe gikan sa tungang gabii hangtod sa alas 6 sa buntag.

Ang konsehal, sa pagkutlo sa datus nga gimantala sa Philippine Information Agency niadtong Agusto 2023, niingon nga sa Kabisay-an, ang Sugbo maoy adunay pinakadaghang trabahante sa IT-BPO nga adunay gibana-banang 200,000 ka full-time nga mga empleyado.

Dugang ni Archival nga ngitngit ang kadalanan sa dakbayan sa Sugbo kon kaadlawon, ug ang seguridad ug kaluwasan sa mga empleyado nabutang sa peligro sa mga kriminal.

Ang resolusyon nihangyo kang Acting City Mayor Raymond Alvin Garcia nga ikonsiderar pag-usab ang pagpabuhi sa libreng sakay sa bus sa Kagamhanan sa Dakbayan sa mga rota sa I.T. Park nga adunay gitakdang hunonganan sa JM Del Mar Ave. ug Geonzon Street sa I.T. Park, ug Metro Colon, Barangay Talamban hangtod sa Cebu Business Park, ug vice versa; uptown areas sa Cebu City nga mohunong sa JY Square, Capitol Building, Fuente Osmeña Circle, Harrison Park sa Osmeña Blvd. ug Abellana National School, ug mga pasahero gikan sa Northern District sa Siyudad nga mohunong sa mga eskina sa F. Cabahug Street, Hipodromo Road, T. Padilla street, Mabolo Church, ug sa mga eskina sa S. Osmeña Street ug Osmeña Blvd.

Gisuwayan pagpangutana sa SunStar Cebu si Archival bahin sa ubang insidente nga nakaaghat sa maong hangyo; bisan pa sa daghang mga pagsulay sa pagtawag kaniadtong Sabado wala kini nitubag.

Gipangayuan og komento, si Greg Perez, lider sa Pagkakaisa ng mga Samahan ng Tsuper sa Opereytor Nationwide sa Cebu, niingon sa pakighinabi sa telepono niadtong Sabado, Hunyo 29, nga naghulat siya nga makabaton og kopya sa giaprubahan nga resolusyon.

Iyang gipadayag ang panginahanglan nga tun-an kini sa higayon nga aduna na siyay kopya sa dili pa mohimo og bisan unsang mga pamahayag mahitungod niini.

Ang Siyudad nipatuman og libreng sakay sa bus niadtong 2018 apan, nahunong atol sa kausaban sa administrasyon sa Kagamhanan sa Siyudad. / JPS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph