Dakong beach resort sa Barangay Tawala, lungsod sa Panglao, lalawigan sa Bohol gikandaduhan sa kagamhanan sa lungsod human nagpadayon sa pag-operate bisan way business permit.
Nangunay si Mayor Edgardo Arcay sa pagkandado sa Villa Tomasa Q White Beach Resort uban sa iyang hepe sa Business Permit Licensing Office aron pag-serve sa closure order pinitsahan og Abril 16, 2024.
Ang Villa Tomasa Q White Beach Resort gipanag-iya sa pamilya’ng Guardo nga taga dakbayan sa Sugbo, apan nag-abang lang sila sa dapit nga kanhi Alona Kew White Beach Resort.
Atol sa pag-serve sa closure order, niatubang sa mayor si Dondon Guardo, usa sa mga tag-iya sa establisemento ug niangkon nga wala silay permit tungod kay wala maproseso sa ilang giabangan.
Alang sa mayor, wala na silay labot sa problema sa Villa Tomasa sa nagpaabang kanila.
Matod ni Arcay nga niadtong Abril 6, 2024 nipadala na silag notice aron ipahibawo nga kinahanglan na sila mo renew sa ilang business permit apan wala pasudla ang taga BPLO sa ilang gwardya.
“Oras nga ma comply nila tanan nga duna na silay business permit, I can lift (the closure order), samtang wala pa, sirado gyud,” matod ni Arcay.
Nibahad ang mayor nga kon mosupak ang pamilya'ng Guardo sa iyang kamandoan ug magpadayon sa pag operate, mag-atubang og dako’ng kaso.
GIPAABANGAN
Ang dapit gipanag-iya sa magtiayong Eteria Evelyn Naval-Flores ug Magileo Wlfredo D. Flores.
Matod sa magtiayon nga niadtong Enero 2023, ang pamilyang Guardo nisugyot nga andam sila nga moabang sa kanhi Alona Kew White Beach Resort sa kantidad nga P10 milyunes matag buwan.
Dali sila nga nagkasinabot nga tungod ani, pagka Enero 30, 2023, nagpinirmahay sila og kontrata.
Nagsugod ang problema sa duha ka mga habig sa dihang wala na mahatag ang binuwan nga abang sa Alona Kew.
Ang magtiayon nialigar nga sa matag panahon nga dili na makahatag sa abang ug niuntol na ang tseke nga gibayad, nipadala na sila og demand letters aron pagdemanda nga bayran ang nahabilin nga utang nga niburot na ngadto sa P63.7 milyunes.
Nakadesisyon na usab ang pamilyang Flores nga ila nang i-terminate ang kontrata human ang mga Guardo nakalapas sa gipermahang kasabutan ug ang pagpalta sa abang niini sulod sa pila ka buwan.
Atol sa matag meeting, nagtinguha ang pamilya’ng Guardo nga mohimo og laing kontrata apan hugot na sa ilang desisyon ang pamilyang Flores nga dili na mopadayon.
Marso 27, 2024 nipadala na usab sila sa ikatulo nga higayon og suwat aron ipahibawo nga dili na sila mosugot sa counter proposal dungan sa demanda nga bayran ang nahabilin niini nga utang ug papahawaon na sila sa resort.
Apan nasagmuyo ang tag-iya sa Alona Kew nga bisan sa ilang demanda nidumili kini sa pagpahawa.
Gani nagdugang pa og mga security personnel ang pamilya’ng Guardo aron dili makasulod ang mga personnel sa Alona Kew sa resort.
Atol sa closure order, dinhi pa hingpit nakasulod ang giandam nga personnel sa pamilyang Flores bisan sa pahibawo sa pamilyang Guardo nga duna pa silay mga guest ug umaabot nga guests sa mosunod unom ka mga buwan. /AYB