Usa ka inilang kan-anan sa sulod sa mall nahimutang sa Barangay Luz, Dakbayan sa Sugbo ang gialarma sa Cebu City Fire Station sa ala 1:02 sa hapon, Sabado, Abril 12, 2025.
Ang maong insidente dali ra usab nga napawong sa pag-abot sa mga fire fighter ala 1:09 sa hapon.
Gibanabana sa kabomberohan nga moabot sa P160,000 ang danyos sa hitabo ug way natala nga naangol ilabi na sa mga kawani niini.
Matod ni Senior Fire Officer 2 Wendell Villanueva, information officer sa Cebu City Fire Station nga nagsugod ang kayo sa kusina sa maong kan-anan apan wala pa matino kon unsay hinungdan kay nagpadayon pa ang ilang imbestigasyon.
Wala na sab makakatap ngadto sa mga silingang tenant sa sulod sa mall ug dali ra sab napawong ang kayo pinaagi sa mga trabahante niini. / AYB