Patay ang usa ka 82 anyos nga retired engineer dihang gipusil samtang naglingkod sa iyang payag sa umahan sa Sityo Bulahan, Brgy. Carmen, Siyudad sa Toledo, alas 11:15 sa buntag, Miyerkules, Hulyo 31, 2024.
Sa pagtamod sa polisiya sa kapulisan, ang biktima giila lang sa ngan nga ‘Fidel’, byudo, taga Barangay Sangi, Toledo City.
Sa pakighinabi sa Superbalita Cebu kang P/SSgt. Richard Oberez, investigator on case sa kapulisan sa Toledo City, nasuta nga naglingkod ang biktima sa payag sa iyang farm.
Matod niya nga dunay duha ka mga tawo nga nagmotorsiklo nga ning-abot, pulos nag-helmet, nagtaptap sa ilang mga nawong.
Ang angkas maoy nikanaug ug nangutana sa mga trabahante sa biktima kon namaligya ba sila og lemonsito.
Dihang nakit-an ang biktima nga naglingkod sa iyang payag, kalit kining gipusil sa makadaghang mga higayon.
Ang wa mailhing mamumuno daling nisibat sakay sa motorsiklo ug wa na maabti sa mga polis sa Toledo City nga ningresponde sa alarma ubos sa kamandoan sa ilang hepe nga si P/Lt. Col Manolo F Salvatiera.
Ang biktima gidali sa pagdala sa mga rescuer ngadto sa Toledo City Hospital apan nakabsan sa iyang kinabuhi.
Matod ni Oberez nga sa pagkakaron, padayon ang ilang imbestigasyon aron pagsuta sa motibo sa krimen ug pag-ila sa mga mamumuno. / DVG