Usa ka retiradong polis nga nagmaneho og public utility jeepney (PUJ) ang gipadakop sa laing dryaber sa PUJ niadtong Sabado, Hulyo 27, 2024, alas 10 sa buntag, sa Salinas Drive, Barangay Lahug, dakbayan sa Sugbo human giingong nanion sa iyang dala nga armas.
Ang nabalhog sa Mabolo Police Station giila sa alyas nga Cirilo, 57, taga PC Hills, Barangay Apas, siyudad sa Sugbo.
Ang biktima nga si alyas Rodulfo unang nireklamo sa duha ka polis nga nagsilbing beat patrollers sa dapit nga siya gitionan og armas sa suspetsado. Tungod kay armado, nanawag og mga sakop sa Special Weapon and Tactics (Swat) team ang duha ka polis ug personnel sa Motorcycle Riding Unit (RMU) aron babagan ang PUJ nga gimaneho sa suspetsado.
Malampuson nga nadakpan si alyas Cirilo ug nakuha usab sa mga ningresponding polis ang dala niini nga .38 caliber pistol ug mga bala niini.
Nakapakita hinuon og lisensya ug mga papeles ang maong driver nga tungod niini, giuli ra usab ni sa mga polis kaniya.
Matod ni Police Major Romeo Caacoy, hepe sa Mabolo Police Station, nga ilang pasakaan og grave threat ang kanhi polis subay sa iyang pagpanion og armas ngadto sa biktima nga usa usab ka dryaber. / AYB