Wa mohatag og komentaryo si TNT head coach Chot Reyes kabahin sa one-on-one nga trade tali nila Mikey Williams ug Jordan Heading, tungod kay naghuwat pa ang Tropang 5G ug Converge sa approval gikan sa opisina sa PBA Commissioner.
“I don’t want to comment on it until it gets approval. It’s now with the PBA office. I will reserve my comments,” matod ni Reyes human sa kadaugan sa TNT kontra NorthPort, 94-70, niadtong Biyernes.
Kon maaprobahan na, magkabuwag na ang TNT ug si Williams, nga nakadaug og duha ka Finals MVP awards sa 2021 Philippine Cup ug sa 2024 Governors’ Cup.
Apan sukad sa ilang titulo sa Governors’ Cup niadtong Nobyembre 8, 2024, wala na nakadula si Williams para sa TNT tungod sa wa pagkasabot sa iyang bag-ong kontrata.
Ang TNT maoy gihapon tag-iya sa playing rights ni Williams, ug kini ilang ibaylo ngadto sa Converge kung maaprubahan na ang trade.
Si Heading, sa laing bahin, magkatakdo pag-usab kang coach Reyes — nga kaniadto iyang coach sa Gilas Pilipinas. / RSC