Gihatagan og pasidungog ang Joy Ride rider nga nigukod sa naka hit and run patay sa usa ka lalaki nga naglakaw daplin sa karsada sa V. Rama Ave., Dakbayan sa Sugbo niadtong Biyernes sa kaadlawon, Hulyo 26, 2024.
Si Reigner Casas, 35, gitunolan og plaque of appreciation ni P/Lt. Col. Miguel Andeza, hepe sa Traffic Enforcement Unit (TEU) sa Cebu City Police Office (CCPO) sa iyang buhatan uban kang Cebu City Transportation Office (CCTO) assistant department head Atty. Kent Francesco Jongoy.
Gawas sa plague, gihatagan usab si Casas og kuwarta ug grocery items aron dunay madala sa iyang pamilya.
Matod ni Andeza, ang gibuhat ni Casas dako kayo og natabang sa pagsulbad sa maong insidente diin nadakpan nila ang drayber bisan pa kon wala na mopasaka og kaso ang kabanay ni Procolito Alquizalas nga taga Barangay Candugay, lungsod sa Barili, kasadpang habagatang Sugbo.
“Nagpasalamat mi og dako sa atoang rider sa Joy Ride nga si Reigner Casas sa pagtabang sa atong investigation sa Traffic Enforcement Unit kay kon wala pa ni siya magpakabana possibly nagtagbaw pa ta’g pangita sa CCTV karon, nag subay-subay pa ta,” matod ni Andeza.
Si Jongoy nagkanayon nga ang Traffic Management Coordination Committee niduso og resolusyon sa board aron pasidunggan si Casas.
Nakadayeg si Jongoy sa gihimo sa Joy Ride rider tungod kay nagpakabana gyud kini sa nahitabo sa palibot, nakatabang og dako sa kapulisan ug sa mga traffic enforcer nga tungod ini niawhag siya sa publiko nga sundon ang gihimo ni Casas.
“Katong iyang gibuhat dako kaayo to’g tabang dili lang sa kapulisan apil na pud sa amoa sa mga traffic enforcer diha sa kadalanan,”matod ni Jongoy.
Nagpasalamat usab si Casas sa gihatag nga pasidungog kaniya sa TEU nga bisan sa iyang gihulagway nga gamay niya nga natampo sa kadalanan, gihatagan kini’g gibug-aton sa maong opisina.
Giangkon niya nga atol sa maong insidente diin nakita niya nga nabanggaan ang usa ka tawo, walay lain nga nabutang sa iyang huna-huna kon di mao ang pagtabang nga madakpan ang nakabangga.
“Dako kaayo nig impact sa akoa nga na appreciate nila ang atoang effort. Although gamay rato nga effort nga atong gi-exert kay ni cooperate man pud ang tawo sa atoa, mao nang malipayon pud ta,” matod ni Casas.
Mensahe niya sa ubang riders nga kon duna silay masugatan o masaksihan nga aksidente diin ang nakahimo mosibat, labing maayo nga motabang sila aron masulbad ang krimen.
Gipasidunggan usab ni Andeza ang iyang mga personnel nga nagkugi sa ilang trabaho sama niadtong daghan og nangadakpan nga mga malapason sa balaod trapiko. / AYB