WAY suwerte ang usa ka tulisan nga nanulis sa driver sa Maxim kay gawas nga P100 ra ang kuwarta nga nakuha, nadakpan pa hinuon sa mga polis sa Dakbayan sa Toledo sulod lang sa 3 minutos human nila madawat ang alarma.
Ang insidente nahitabo alas 11:40 sa buntag, Martes, Hunyo 24, 2025, sa Barangay Talavera sa maong siyudad.
Ang suspek giila nga si Rodaive Asintesta Belleza, 37, ulitawo nga taga Barangay Langtad, Siyudad sa Naga.
Matod sa biktima nga si Jamerito Abrasada Paired, 49, taga Sitio Kimba, Barangay Cansojong, Siyudad sa Talisay nga nag-book niya ang suspek ug nisakay atbang sa South Bus Teminal aron magpahatod sa terminal sa mga tricycle sa Tabunok.
Pag-abot sa Tabunok, nihangyo ang suspek nga magpahatod sa Campo 1 nga sakop sa Talisay ug sa dihang naabot kini sa ilang destinasyon inay mokanaog, nideklarar na hinuon og tulis dayong tion sa dala niini nga armas ug naabot ang ilang biyahe sa Toledo.
“Pag-abot namo sa Campo 1 diretso siyag tion, niingon nga “Sir ayaw na lang pagreklamo dagan na lang aron di ka mamatay” ingon ko ayaw sir mao to nidagan na lang pud ko,” matod ni Paired.
Dugang sa biktima nga wala na lang siya moreklamo sa kahadlok nga pusilon tungod kay kanunay nga gition sa suspek ang armas sa iyang kilid.
Pag-abot nila sa Barangay Dumlog, giingnan niya ang tulisan nga wala siyay kuwarta kay ikaduha pa siya nga pasahero niini. Aron pagsiguro nga tinuod ang iyang gisulti gipakita sa biktima iyang P100.00 ug gimanduan siya sa suspek nga ihunong ang motor ug gikuha iyang kuwarta.
“Ikaduha pa nako siya nga pasahero ako siya giingnan, pagnaog niya nangayo siya og kuwarta ako giingnan nga 100 ra lagi ni sir, ana siya ambi nalang na,” matod ni Paired.
Human nga nakanaog ang suspek, ni-report dayon ni sa kapulisan sa Toledo ug gihatag ang hulagway sa nagtulis kaniya nga daling girespondihan.
Sulod lang sa 3 minutos nadakpan ang suspek sa sulod sa usa ka balay sa Barangay Talavera nga nisuway pagtago.
Gitug-an sa hepe sa Toledo Police nga si Lieutenant Colonel Wilfredo Alarcon Jr. nga naatol nga ang tag-iya sa gisudlang balay sa suspek usa ka retired nga sundalo nga maoy hinungdan nga kini nadakpan.
Gihulagway ni Alarcon nga high sa ilegal nga drugas ang maong suspek atol sa pagdakop niini.
Nakuha sa mga polis ang armas nga gigamit sa pagtulis sa maxim driver ug ilegal nga drugas atol sa pagrekisa niini.
Kasong Robbery with Intimidation, Illegal Possession of Firearms ug paghupot og ilegal nga drugas ang atubangon nga kaso sa suspek ug kasamtangan kini nga gibalhog sa custodial facility sa Toledo City Police Station. / AYB