Usa ka drayber sa motorsiklo nga nakabsan sa iyang kinabuhi human nibangga sa fire truck nga niresponde sa sunog sa Zone Talong, Barangay Paknaan, Dakbayan sa Mandaue pasado alas 8 sa gabii sa Dominggo, Marso 23, 2025.
Ang biktima giila nga si Juan Paulo Mindo, 23 anyos, usa ka call center agent nga taga Sitio Sunlot, Barangay Calawisan, Dakbayan sa Lapu-Lapu.
Ang motorsiklo ni Mindo nabangga sa firetruck gikan sa Cebu Filipino-Chinese Volunteers Fire Brigade sa A.C. Cortes ug Plaridel Street intersection sa Barangay Cambaro, Mandaue City.
Daling gidala si Mindo sa Mandaue City Hospital apan gideklarar siya nga dead on arrival.
Si Police Lieutenant Colonel Mercy Villaro, tigpamaba sa Mandaue City Police Office, nikumpirmar nga nag-red light ang firetruck dihang milabang sa intersection, samtang green light ang motorsiklo ni Mindo.
Ang drayber sa firetruck nitahan sa awtoridad ug posibleng mag-atubang og kasong reckless imprudence resulting in homicide with damage to property, depende sa desisyon sa pamilya sa biktima. / CAV, DPC, DVG