Rider ‘nanulis’ sa kompaniya, sikop sa kapulisan
SunStar Local News GPX

Rider ‘nanulis’ sa kompaniya, sikop sa kapulisan

Usa ka delivery rider giposasan human gitudlo nga suspek sa pagtulis sa iyang gitrabahoan sa Barangay Basak San Nicolas, dakbayan sa Sugbo, alas 9:40 sa gabii, Dominggo, May 5, 2024.

Si Ferdinand Yap Manio, 42, minyo, rider sa usa ka parcel company ug taga Bayabas Extension sa dan Ganciang, Brgy. Punta Princesa, dakbayan sa Sugbo.

Si Manio positibong giila ug gitudlo sa duha ka mga saksi nga admin staff sa parcel company nga sila si Jiesabel Mier ug Joel Guanzon.

Si Mier ug Guanzon, nag-inventory sila niadtong higayuna sa Parcel room ug kalit nga may usa ka lalaki nga misulod, naka-black helmet, nagtabon sa bath towel, nagsul-ob og grey jacket nga may hood ug naka-black pants.

Matod pa, nagbitbit kinig pistola ug nition kanila ug dayon nideklarar kini’g tulis diin nakuha ang P200,000 nga cash.

Ang suspek mimando sa duha ka admin staff nga mosulod sa COD room diin naa didto ang vault.

Sa pagsulod nila, matod sa mga saksi, giliso ang CCTV camera aron dili makita. ug gigapos ang duha ka tiil ug kamot ni Guanzon.

Dugang sa mga saksi, gimandoan si Mier nga ablihan ang vault ug nakuha ang cash P261,121. Sumala pa, ang tanang kwarta P465,460.14.

Apan sa follow up sa kapulisan, nadakpan ang suspek.

Apan nanghimakak kini sa krimen dihang gikuhaa’g ha­big sa Superbalita Cebu. / GPL

SunStar Publishing Inc.
www.sunstar.com.ph