GIBALHIN sa tambalanan sa Dakbayan sa Sugbo ang drayber niadtong motorsiklo gumikan human nakasugat og vehicular accident tali sa service vehicle sa Cebu Provincial Government niadtong alas 2:15 sa hapon sa Marso 25, 2025, sa National Highway sa Sitio Prensa, Barangay Talaga, Lungsod sa Argao.
Base sa inisyal nga kasayuran nga ang drayber sa motorsiklo giila nga si Melvin Lubogan, 39, ulitawo, taga Brgy. Balisong, Argao samtang ang drayber sa sakyanan sa Kapitolyo sa Engineering Department gimaneho ni Brenny Custodio, 42, taga Dakbayan sa Carcar.
Nasayran sa Superbalita Cebu human nahinabi si Custodio nga gikan sila sa Lungsod sa Dalaguete ug paingon sa Brgy. Tiguib, bukirang bahin sa Argao aron nga mosusi sa gitukod nga barangay hall.
Atol sa ilang pagtangas sa sakaon nga bahin sa bukid, kalit lang nga adunay nibutho nga motorsiklo sa wala nga bahin sa sakyanan hinungdan nga nagkasaghid ang motor ug ang maong service vehicle sa Probinsiya ug nalabay ang rider sa sementado nga dalan ug naparok ang ulo.
Ang kapulisan sa Argao ka-samtangan nga nikustodiya ni Custodio samtang nagpaabot og amicable settlement tali sa maong rider. / DVG