Anaa sa talandugon nga kahimtang ang 59 anyos nga driver sa motor nga nag beating the red light ug nabangga sa laing motorsiklo sa intersection sa P. Del Rosario corner Junquera St., Barangay San Antonio, Cebu City alas 8:58 sa gabii, Biyernes, Agusto 21, 2026.
Ang unconscious nga gidala sa Cebu City Medical Center (CCMC) mao si Segundo Butaya, 59, taga Barangay Catarman, lungsod sa Liloan, nga driver sa Honda Click.
Samtang nakaangkon lang og minor nga angol ang back ride niini nga si Warren Tudlas, 18, lumad nga taga Ginatilan, lakip na ang driver sa Yamaha Mio nga gikabangga ni Butaya nga si Richard Gabrillo, 50, taga Sityo Ipil, Barangay Basak San Nicolas.
Sa imbestigasyon sa Traffic Enforcement Unit sa Cebu City Police Office, nga base sa kuha sa Eagle Eye sa kagamhanan sa dakbayan sa Sugbo nga naghunong si Gabrillo sanglit naka stop signal ang habig sa dalan Junquera paingon sa downtown area.
Sa dihang nag green light na, niabante si Gabrillo apan si Butaya nga kusog kaayo nga nakapadagan paingon sa south bus terminal nipugos gyud bisan nga naka red signal na ug maayong pagkabangga sa motor ni Gabrillo.
Tungod sa kakusog sa impact nangalamba ang duha ka motor ug nangalagpot ang mga sakay niini.
Pag-abot sa mga medical personnel sa Cebu City Disaster Risk Reduction and Management Office unconscious na si Butaya ug ila dayon ning gidala sa CCMC. / AYB
