Duha ang nakalas sa nahitabong disgrasya sa managlahing lugar sa Dakbayan sa Sugbo sa Huwebes, Hunyo 12, 2025.
Usa sa namatay ang 42 anyos nga lalaki ug naangol sab ang iyang angkas nga iyang kaipon human nawad-an og brake ang ilang motorsiklo ug mibangga sa gutter kilid sa karsada alas 8:12 sa gabii, Huwebes, Hunyo12, 2025, sa Barangay Malubog, Dakbayan sa Sugbo.
Ang biktima nga nakalas diha-diha giila nga si Raul Arnibal Dumdum, 42, taga Kawayan, Sitio San Roque, Barangay Lahug, Siyudad sa Sugbo.
Sa imbestigasyon sa Traffic Enforcement Unit (TEU) sa Cebu City Police Office pinaagi sa pamahayag sa iyang backrider nga si Rosemelyn Malazarte Delartal, 40, gikan sila nga nanglaag sa Tops ug sa ilang pagpauli nawad-an og brake ang ilang motor.
Matod niya nga hinay ang ilang pagdulhog sa Transcentral Highway (TCH) gikan sa Tops habig sa Barangay Malubog apan kalit lang nawagtangan sa brake ang ilang motor hinungdan nga nisutoy kini sa pagdagan.
Pag-abot sa likuon nga bahin sa maong dapit, nitipas na kini sa dalan nga niresulta sa ilang pagkabangga sa gutter sa kilid sa karsada.
Silang duha pulos nangalamba sa semento nga karsada.
Ang mga saksi dali nga nanawag og Emergency Medical Support.
Sa paghiling sa mga medical personnel ni Dumdum, wala na kini vital sign tungod sa dakong kadaot sa ulo ug lawas niini.
Samtang ang iyang backrider nga nakaangkon ug pangos sa lawas ang gidala sa Cebu City Medical Center.
Samtang patay sab ang usa ka 72 anyos nga lola human madasmagan sa usa ka motorsiklo nga gimaneho sa usa ka Indian national sa may dalan C. Padilla, Barangay Pahina San Nicolas, Dakbayan sa Sugbo alas 11:20 sa buntag, Huwebes, Hunyo 12, 2025.
Ang nakabsan sa kinabuhi giila nga si Hermosilla Teves Alivio, residente sa maong lugar.
Sa imbestigasyon sa TEU base sa kuha sa CCTV camera sa dapit, makita nga kusog nga nakapadagan sa iyang motorsiklo ang Indian national nga si Navpreet Singh Shaglani, 18, taga Barangay Bulacao, Dakbayan sa Sugbo ug iyang nadasmagan ang biktima nga mitabok sa karsada.
Tungod sa kakusog sa pagkabangga, nalamba ang biktima ug nakaangkon ug dakong kadaot sa ulo ug lawas niini.
Dali nga gidala ang biktima sa usa ka pribadong tambalanan apan nakabsan sa kinabuhi paglabay sa pipila ka oras.
Kasamtangan’g gikustodiya sa TEU ang driver nga pasakahan na unta og kasong Reckless Imprudence Resulting in Homicide apan nipahibalo ang kabanay sa biktima nga dili na sila mokiha. / AYB