Patay ang driver sa motorsiklo samtang naangol ang angkas niini human mabitik sa kable nga nagbabag sa karsada atol sa kusog nga bunok sa uwan sa may national highway habig sa Barangay Balud, lungsod sa San Fernando, sa alas 6:21 sa gabii, Biyernes, Hunyo 13, 2025.
Ang gideklara nga dead on arrival sa tambalanan mao si Sherwin Jan Arrojado Gempisao, 22, samtang ang naangol nga angkas niini giila nga si Joanna Angel May Saguisabal Aringoy, 25, pulos taga Barangay Panadtaran sa maong lungsod.
Sa imbestigasyon sa San Fernando Police Station base sa pamahayag sa angkas niini nga samtang nagbiyahe sila paingon sa dakbayan Sugbo kalit lang nga mibundak ang kusog nga uwan uban sa kusog nga hangin.
Apan pag-abot sa maong lugar, wala nila mabantayi ang mga kable nga nag-ali sa karsada mugna sa unos nga nagdalag kusog nga uwan, hinungdan nga nabitik ang duroha og nalamba.
Samtang nangatumba sila, wala usab makabantay ang laing sakyanan nga nagsunod kanila ug nalatayan sa ligid si Gempisao.
Dali nga nanawag og rescue ang mga nakasaksi aron madala sa South General Hospital sa Naga City ang mga biktima apan gideklara si Gempisao nga dead on arrival sa attending physician nga si Dr. Daven Rey Trazo tungod sa dakong kadaot sa ulo ug lawas.
Kasamtangan nga milusad pa og follow up investigation ang San Fernando Police Station samtang anaa pa sa tambalanan ang angkas sa motorsiklo. / AYB