Gipangbuntog sa Iloilo-based RKF-Industrial and Installation Services ang Welec x AMC, 74-69, sa finals aron langkaton ang kampyunato sa 2025 Cebu City Sinulog Cup basketball tournament niadtong Dominggo, Enero 26, 2025, sa Cebu Coliseum.
Sama sa naandan, ang produkto sa Adamson University sa Manila nga si Cedric Manzano maoy nangulo sa RKF pinaagi sa iyang 16 puntos ug 17 rebounds.
Si Manzano maoy napiling MVP sa unom ka mga adlaw nga torneyo, nga giorganisar ni Vice Mayor Dondon Hontiveros ug sa Sinulog Foundation, Inc. (SFI).
Ning maong kalampusan, ang RKF nakabulsa og P200,000 nga ganti samtang ang Welec nakadawat og P100,000.
Si Ryan Keith Fio, kinsa maoy tag-iya sa RKF, nibutyag nga naporma ang iyang team sa niagi lang tuig ug nakasalmot kini sa nagkadaiyang mga torneyo sa Western Visayas Region.
Ang Sinulog Cup maoy labing unang torneyo nga naapilan sa RKF sa gawas sa WV Region.
Matod ni Fio nga ang sunod nilang misyon mao ang paglangkat sa korona sa kasamtangang nagpadayon nga Cebu City Mayor Raymond Garcia Cup.
“Masarap ang pakiramdan, kasi yun talaga ang goal nanim eh, makuha ang champion sa Sinulog Cup. So ngayon mayron pa kaming laro sa Mayor Raymond Garcia Cup, so dalawa na ang aming goal. Mag-champion kami back-to-back. Kunin namin yan,” asoy ni Fio.
Sa inilugay sa ikatulong puwesto, gipangmakmak sa University of Cebu (UC) Webmasters ang Cebu City Selection, 85-63.
Ang Webmasters nakakuha og P50,000 samtang ang Cebu City Selection nakadawat og P25,000. / JBM