Road Warriors mosuway pagbihag sa Gin Kings

STAR PLAYER: Milusot si Robert Bolick (No. 8) atol sa ilang duwa kontra Rain or Shine diin mibuhat kini og 38 puntos niadtong Biyernes. / PBA Images
STAR PLAYER: Milusot si Robert Bolick (No. 8) atol sa ilang duwa kontra Rain or Shine diin mibuhat kini og 38 puntos niadtong Biyernes. / PBA Images

Mga duwa karon

3:00 P.M Magnolia Chicken Timplados batok TNT Tropang Giga

6:15 P.M Barangay Ginebra batok NLEX Road Warriors

Krusyal nga tahas ang sagubangon sa NLEX Road Warriors batok sa Barangay Ginebra Gin Kings nga maoy modesisyon sa ilang kapalaran alang sa playoffs karong Dominggo sa gabii, Mayo 5, 2024, sa Ninoy Aquino Stadium sa kaulohan.

Kinahanglan modaug ang Road Warriors sa final game sa elimination round aron makalingkawas sa posible nga tinaktakay alang sa ikawalo nga playoff spot.

Kon mapilde ang NLEX, ilang ikatabla ang Terrafirma Dyip ug Northport Batang Pier sa ikapito ngadto sa ikasiyam nga pwesto nga dunay 5-6 (win-loss) nga baraha. Gikan sa kapildihan ang NLEX batok sa Rain or Shine Elasto Painters, 104-120, niadtong Biyernes.

Samtang ang Gin Kings mahulog nga non-bearing na kanila ang maong duwa kay sigurado naman sila sa No. 2 spot nga naglakip og twice-to-beat advantage bisan mapilde pa sila sa duwa kontra NLEX.

Ang Gin Kings nagbitbit og 7-3 nga baraha, gasunod sila sa sister team San Miguel Beermen nga dunay perpektong 10-0 rekord.

Pero bisan pa nga sigurado na sa top 2 spot, ang Gin Kings ni most-winningest coach Tim Cone di moprino sa Road Warriors kay tuyo sa team nga tapuson ang elimination round og kadaugan aron makaporma og nindot nga momentum padulong playoffs.

Para mabuntog ang higante nga Gin Kings, mosandig ang NLEX sa mga kamot ni Robert Bolick, kinsa mipabuto og 38 puntos batok Rain or Shine.

Lakip pud nga saligan sa NLEX sila si Anthony Paul Semerad, Richie Rodger, Joseph Mateo Nieto Enoch Valdez ug Dominic Fajardo. Ang Gin Kings mosalig nila ni Scottie Thompson, Stanley Pringle Jr., Christian Standhardinger, Japeth Aguilar ug Maverick Ahanmisi.

Sa first game, ang paglihay nga matagak sa playoffs mao pud ang tuyo sa TNT Tropang Giga sa ilang pagbatok sa Magnolia Chicken Timplados Hotshots.

Ang TNT naggunit og 5-5 nga baraha ug kon mapilde sila motabla pud sila sa Dyip ug Batang Pier.

Ang Hotshots (6-4) sa ilang habig, sigurado nang sulod sa playoffs ug ang ilang daog maoy mosilyo sa No. 3 nga posisyon.

Saligan sa TNT ni coach Chot Reyes ang beterano nga si Jayson Castro, rookie bigman Henry Galinato, Calvin Oftana, Brandon Ganuelas-Rosser ug Glenn Khobuntin. Ang Magnolia mosandig nila ni Paul Lee, Ian Sangalang, Mark Barroca Jio Jalalon, ug Calvin Abueva.

Niining pagsuwat, nagkombati ang San Miguel Beermen batok Meralco Bolts (5-5) sa Batangas City Coliseum, ug ang Blackwater Bossing nagduwa kontra Phoenix FuelMasters.

Ang defending champion Beermen (10-0) tuyo nga maperpekto ang ilang 11 ka duwa sa elimination round. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph