Naangkon sa NLEX Road Warriors ang ikaupat ug katapusang luna sa Group B sa crossover quarter-finals human nila giligsan ang Brgy. Ginebra Gin Kings pinaagi sa overtime, 103-99, niadtong Dominggo, Septiyembre 22, 2024, sa Philippine Basketball Association (PBA) Season 49 Governors’ Cup sa Smart Araneta Coliseum.
Gihuman sa Road Warriors ang ilang tahas sa elimination round dala ang 5-5 nga rekord.
Ang Gin Kings, nga nakaseguro nang daan og puwesto sa quarter-finals, natagak sa 6-3 nga rekord.
Gawas sa Road Warriors ug Gin Kings, ang laing duha sa Group B nga nakaabante sa quarter-finals mao ang Rain or Shine Elasto Painters ug San Miguel Beermen.
Sa laing duwa, nidaog ang TNT Tropang Giga batok sa NorthPort Batang Pier, 99-79, sa usa ka non-bearing game sa Group A.
Naangkon sa Tropang Giga ang daog bisan wala ang ilang import nga si Rondae Hollis Jefferson, kinsa adunay angol sa iyang tuo nga tiil.
Ang Tropang Giga maoy No. 1 sa Group A bitbit ang 8-2 nga rekord samtang ang Batang Pier nanamilit bawon ang 3-7 nga rekord. / ESL