Gibabagan sa 7-foot-4 Victor Wembanyama sa San Antonio Spurs ang tuyo sa Houston Rockets sa ilang korte sa National Basketball Association (NBA) kagahapon, Oktubre 27 (PH time).
Mipahagsa og 29 puntos, pito ka rebounds ug tulo ka blocks si Wembanyama aron aswaton ang Spurs ngadto sa 109-106 nga kadaogan batok sa ilang Texas rival nga Rockets sa home opener game.
Si Jeremy Sochan midugang og 17 puntos lakip ang 12 rebounds aron tabagan si Wembanyama ug ang Spurs.
Ang Rockets mipagawas og 21-8 run sa unang sayis minutos sa fourth quarter aron makabalik human malubong og 22 puntos sa first half. Apan pakyas kini pag-ilog sa labaw ug natumba gyud sila sa korte sa Spurs.
Ang Rockets nakakuha og 27 puntos gikan kang Jalen Green, 18 puntos kang Fred VanVleet ug 16 puntos kang Dillon Brooks.
Sa pagtabok ngadto sa East side, gidauban sa Miami Heat ang Charlotte Hornets, 114-106, didto mismo sa korte sa nauwahi.
Ang All-Star nga si Jimmy Butler maoy nangulo sa Heat sa iyang 26 puntos, walo ka rebounds ug walo ka assists, samtang si Tyler Herro migisi sa ring sa iyang lima ka tres ug 22 puntos.
Nagdilaab pud ang kamot ni Terry Rozier nga dunay 19 puntos, ug si Bam Adebayo mitunol og 12 puntos ug 11 rebounds alang sa Heat.
Si LaMelo Ball mitali og 27 puntos, walo ka rebounds ug pito ka assists alang sa Hornets. / RSC