Human naapil ang iyang pangalan sa posibleng sunod makontra ni Filipino boxing icon Manny Pacquiao, si World Boxing Association (WBA) welterweight champion American Rolly Romero nipadayag dayon sa iyang kaandam nga makig-away sa Pambansang Kamao ng Pilipinas.
“A Hall of Famer on my resume, who wouldn’t want that? That’s the easiest way to get into the Hall of Fame, right?” matod ni Romero sa interbyu sa www.boxingscene.com.
Si Romero, 29, kinsa adunay 17-2, 13KOs nga rekord, gitumbok sa adviser ni Pacquiao nga si Sean Gibbons nga labing maayong iparang sa Pambansang Kamao ng Pilipinas sa umaabot.
Labing seguro, gipili ni Gibbons si Romero gumikan makadani ang estilo niini og halin sa pay-per-view, nga naobserbahan sa away niini batok nila ni Ryan Garcia ug WBA lightweight champion Gervonta “Tank” Davis, kinsa apil sab sa lista.
Gipasabot ni Gibbons nga gusto siya og kontra nga andam makigbinukbokay og maayo nga kon mahimo wala’y atrasay.
Matod ni Gibbons nga ang kontra ni Pacquiao sa comeback fight niini nga si World Boxing Council (WBC) welterweight champion American Mario Barrios wala na nisukol og saktong binukbokay human naigo sa kumo sa 8-division world champion sulod lang sa pipila ka mga higayon.
Ang away nila ni Pacquiao ug Barrios, nga gipahigayon lang niadtong Dominggo, Hulyo 20, 2025, niresulta sa majority draw.
“Manny, even at 46, showed up like he always does, but after Manny tagged the guy a few times, he calmed down,” batbat ni Gibbons kabahin ni Barrios.
“They robbed Manny Pacquiao of history … because the guy stayed on his bike running. Mario Barrios … lost the fight, and my heart bleeds for Manny Pacquiao.”
Tungod niini, gusto ni Gibbons nga ang sama ni Romero og estilo, nga andam makigbinukbokay og maayo, maoy sunod nga makontra sa Hall of Famer niyang batos.
Dako ang posibilidad nga mahitabo ang tinguha ni Gibbons gumikan kay niini pa lang ka sayo, giklaro na ni Romero nga dili pinansyal ang iyang giapas kon iyang ikaharong si Pacquiao, kon dili ang dungog nga makontra ang usa ka boxing icon. / ESL