Ang pirmadong rookie card ni Michael Jordan gikan sa 1986-87 Fleer set ang nabaligya sa auction og rekord nga kantidad nga $2.5 milyones.
Kini ang labing mahal nga nahalin alang sa usa ka Jordan rookie card base sa datos sa sports collectibles media platform nga Cllct.
Ang nakadaug nga bidder, nga maoy usa ra ka tawo ang nipusta, mao ang $2 milyon sa auction house nga Joopiter, nga nagdugang og 25 porsyento buyer’s premium, hinungdan nga nisaka sa $2.5 milyon ang total nga presyo.
Sumala sa FOS, usa ka memorabilia appraiser ang mitug-an nga ang "fair market value" sa maong card kay mga $1 milyon ra unta. Ang card gisusi ug gi-certify sa PSA, diin nakuha niini ang rating nga 9 sa 10 sa kondisyon, samtang ang pirma ni Jordan nakaangkon og perpektong rating nga 10.
Bisan pa og usa ra ang mipusta og nakadaug, nga hangtod karon wala mailhi ang pangalan, nagsugod na og daghang pangutana sa industriya sa trading cards. Apan, matod sa Joopiter ngadto sa FOS nga daghan ang potensyal nga mamalitay gikan sa 50 ka nasud nga mipakita og interes sa auction.
Sa kasaysayan, ang labing mahal nga Jordan card nga nabaligya mao ang 1-of-1 nga 2003-04 Upper Deck Ultimate Collection autographed Logoman card nga nabaligya og $2.928 milyon niadtong Hunyo 2024. / RSC