Nikulit og kasaysayan ang Rain or Shine Elasto Painters sa ilang pagmasaker sa Blackwater Bossing, 151-95, sa premirong duwa niadtong Martes, Marso 31, 2026, sa Philippine Basketball Association (PBA) Season 50 Commissioner’s Cup sa Ninoy Aquino Stadium.
Ang 56 puntos nga kadaugan mao na karon ang labing dakong biya nga nahitabo sa kasaysayan sa labing unang professional nga liga sa Asya.
Nabuak niini ang 55 puntos nga demolisyon nga nahimo sa U/tex batok sa Great Taste niadtong Hulyo 12, 1980 sa Open Conference semi-finals.
Gimugna ni Andrei Caracut sa 1st quarter ang 18 sa iyang kinatibuk-ang 22 puntos aron dugkatan ang pagdilaab sa opensa sa Elasto Painters.
Ang kainit sa opensa ni Caracut ningkuyanap ngadto sa iyang mga kauban sa pagpadayon sa duwa hangtod na sa katapusang gutlo.
“That’s our identity. We like to get out quickly in transition, we like to find our rhythm in the open court. That’s how we generate our looks and our shots. Mabuti pumasok iyung mga unang tira namin, nagka-momentum kami sa umpisa pa lang,” matod ni Rain or Shine coach Yeng Guiao.
Gawas ni Caracut, aduna pa’y laing pito ka mga magduduwa ang Elasto Painters nga nakamugna og dobleng numero nga puntos.
Pagkahuman sa 1st quarter, taga liog na ang labaw sa Elasto Painters, 42-15, ug niini pa lang ka sayo, nianinaw na ang ilang gipintal nga kapildihan batok sa Bossing.
Sa main game, gisugat og dakong kadaugan ang bag-ong import sa San Miguel Beermen nga si Justin Patton batok sa guest squad Macau Black Knights, 110-94.
Puntos matag usa:
1st game:
Rain or Shine (151) – Caracut 22, Johnson 20, Cuajao 15, Mamuyac 15, Roque 13, Nocum 12, Santillan 12, Asistio 12, Clarito 6, Lemetti 6, Manaytay 6, Villegas 5, David 4.
Blackwater (95)- Upshaw III 24, Ilagan 14, Barefield 12, Murrell 9, Escoto 9, Tratter 9, Una 5, David 5, Guinto 4, Panopio 2.
2nd game;
San Miguel (110) - Perez 26, Patton 24, Fajardo 16, Lassiter 12, Trollano 10, Cruz 7, Tautuaa 6, Tiongson 5, Brondial 2, Calma 2.
Macau (94) - Mitchell 23, Chongqui 19, Cao 18, Lao 15, Leung 11, Shackelford 6, Chao 2. / ESL